पुणे, प्रतिनिधी : भारती विद्यापीठ पोलिसांनी कात्रज परिसरात धडक कारवाई करत व्हॉट्सअॅपच्या माध्यमातून चालविल्या जाणाऱ्या देहव्यापाराच्या ऑनलाइन रॅकेटचा भांडाफोड केला. या कारवाईत वेश्याव्यवसायासाठी डांबून ठेवलेल्या परराज्यातील दोन तरुणींची सुखरूप सुटका करण्यात आली असून एका दलालाला अटक करण्यात आली आहे.
पोलिसांना मिळालेल्या गोपनीय माहितीच्या आधारे वरिष्ठ पोलीस निरीक्षक मानसिंग पाटील यांच्या मार्गदर्शनाखाली गुन्हे प्रकटीकरण पथकाने बनावट ग्राहक तयार करून कात्रज येथील किनारा लॉजमध्ये सापळा रचला. तपासादरम्यान आरोपी ग्राहकांना व्हॉट्सअॅपवर महिलांचे फोटो पाठवून त्यांची निवड करण्यास सांगत देहव्यापारासाठी बोलावत असल्याचे उघड झाले.
बनावट ग्राहकांकडून व्यवहाराची खात्री झाल्यानंतर पोलिसांनी लॉजवर छापा टाकत दोन तरुणींची सुटका केली. तसेच या रॅकेटचा सूत्रधार असलेल्या दलालाला ताब्यात घेऊन अटक करण्यात आली.
या कारवाईमुळे ऑनलाइन माध्यमांचा वापर करून सुरू असलेल्या देहव्यापाराच्या जाळ्याला मोठा धक्का बसला असून या रॅकेटमध्ये आणखी कोणाचा सहभाग आहे का, याचा तपास भारती विद्यापीठ पोलीस करत आहेत. पोलिसांनी संबंधित आरोपीविरुद्ध अनैतिक मानवी वाहतूक प्रतिबंधक कायद्यान्वये गुन्हा दाखल केला असून पुढील तपास सुरू आहे.
