पिंपरी-चिंचवडच्या पैलवान काळुराम लांडगे ‘राज्यस्तरीय आदर्श कार्यगौरव समाजरत्न पुरस्कार २०२६’ ने सन्मानित
पिंपरी-चिंचवड (प्रतिनिधी): कासारवाडी येथील सुपुत्र व विविध सामाजिक क्षेत्रात उल्लेखनीय कार्य करणारे पैलवान काळुराम लांडगे यांना दौंड येथे आयोजित राज्यस्तरीय सोहळ्यात “राज्यस्तरीय आदर्श कार्यगौरव समाजरत्न पुरस्कार २०२६” प्रदान करून सन्मानित करण्यात आले.
ज्ञानसंकल्प सामाजिक संस्था, महाराष्ट्र राज्य यांच्या वतीने दौंड येथील एसआरपीएफ ग्रुप क्रमांक ७ मंगल कार्यालयात आयोजित राज्यस्तरीय कार्यक्रमात राज्यभरातील १५ निवडक सामाजिक कार्यकर्त्यांचा गौरव करण्यात आला. समाजसेवा, शिक्षण, क्रीडा, कला, संस्कृती, पर्यावरण, आरोग्य, पत्रकारिता, उद्योग, साहित्य, सहकार, कृषी, विज्ञान तसेच वंचित व उपेक्षित घटकांसाठी केलेल्या सेवाभावी आणि उल्लेखनीय कार्याची दखल घेत पैलवान काळुराम लांडगे यांची या प्रतिष्ठित पुरस्कारासाठी निवड करण्यात आली.
समाजहितासाठी सातत्याने केलेले कार्य, संकटांवर मात करत जिद्द, धैर्य आणि सेवाभाव जपत इतरांच्या मदतीसाठी सदैव धावून जाण्याची त्यांची वृत्ती प्रेरणादायी असल्याचे गौरवोद्गार यावेळी मान्यवरांनी काढले.
हा पुरस्कार पुणे जिल्हा परिषदेचे सदस्य साहेबराव पोळ, नाशिक राज्य उत्पादन शुल्क विभागाचे पोलीस अधीक्षक संतोष झगडे, दौंड भाजपच्या उपाध्यक्षा सरिताताई कुल आणि गोपाळवाडीच्या सरपंच स्वातीताई पवार यांच्या हस्ते सन्मानचिन्ह, सन्मानपत्र आणि पदक देऊन प्रदान करण्यात आला.
कार्यक्रमाच्या यशस्वी आयोजनासाठी ज्ञानसंकल्प सामाजिक संस्थेचे संस्थापक अध्यक्ष सदाशिव रणदिवे व त्यांच्या संपूर्ण टीमने विशेष परिश्रम घेतले. कार्यक्रमाचे सूत्रसंचालन प्रा. दिनेश पवार यांनी केले. या सोहळ्यास पुरस्कारार्थींचे नातेवाईक, विविध क्षेत्रातील मान्यवर तसेच नागरिक मोठ्या संख्येने उपस्थित होते.
