पूर्वीच्या भांडणाचा राग; डोक्यावर-हातावर वार करून गंभीर जखमी, चार जणांविरोधात गुन्हा
पिंपरी-चिंचवड, दि. २३ जून २०२६ – चिखली परिसरात पुन्हा एकदा कोयता गँगची दहशत समोर आली असून, पूर्वीच्या भांडणाचा राग मनात धरून चार जणांनी एका तरुणावर कोयत्याने जीवघेणा हल्ला केल्याची धक्कादायक घटना उघडकीस आली आहे. या हल्ल्यात तरुण गंभीर जखमी झाला असून, आरोपींनी हल्ल्यानंतर परिसरात हवेत कोयते उगारून नागरिकांना धमकावत दहशत माजवल्याचा आरोप आहे. या प्रकरणी चिखली पोलीस ठाण्यात गुन्हा दाखल करण्यात आला असून एक आरोपी अटकेत आहे.
पोलिसांनी दिलेल्या माहितीनुसार, ही घटना दि. २१ जून २०२६ रोजी सायंकाळी सुमारे ४ वाजण्याच्या सुमारास नरसिंह ऑटो गॅरेज, भाजी मंडई रोड आणि जय अंधे इलेक्ट्रिकल्स, साने चौक, चिखली येथे घडली. याप्रकरणी विनायक ऊर्फ बाबू राजू ननावरे (वय २४, रा. सुदर्शन नगर, रस्ता क्र. २, रत्नछाया बिल्डिंग, साने चौक, चिखली) यांनी फिर्याद दिली आहे.
या फिर्यादीवरून पोलिसांनी सिद्धार्थ घाईजे (वय २१, पत्राशेड, अजंठनगर, निगडी), शिवशंकर श्रीमंगल (वय २०, मेदनवाडी, चाकण) आणि त्यांच्या दोन अनोळखी साथीदारांविरोधात गुन्हा दाखल केला आहे. यापैकी एक आरोपी पोलिसांच्या ताब्यात असल्याची माहिती आहे.
फिर्यादीत नमूद केल्यानुसार, आरोपींनी पूर्वी झालेल्या भांडणाचा राग मनात ठेवून विनायक ननावरे यांच्यावर जीवे मारण्याच्या उद्देशाने कोयत्याने डोक्यावर आणि हातावर वार केले. या हल्ल्यात ते गंभीर जखमी झाले. तसेच फिर्यादीचा मित्र कार्तिक कसाळकर यालाही मारहाण करण्यात आली. हल्ल्यानंतर आरोपींनी घटनास्थळावरून निघताना हवेत कोयते उगारून “समोर आला तर एकेकाला बघून घेऊ” अशी धमकी देत परिसरात दहशत निर्माण केल्याचे फिर्यादीत म्हटले आहे.
या प्रकरणी चिखली पोलीस ठाण्यात गुन्हा क्रमांक ४१९/२०२६ दाखल करण्यात आला असून आरोपींवर भारतीय न्याय संहिता (BNS) कलम १०९, ११५(२), ३(५), शस्त्र अधिनियम कलम ४, २५, २७ तसेच क्रिमिनल लॉ अमेंडमेंट अॅक्ट कलम ३, ७ अंतर्गत गुन्हा नोंदवण्यात आला आहे. या प्रकरणाचा पुढील तपास पोलीस करत आहेत.
