स्वारगेट मुख्यालयात मोफत योग व हास्ययोग शिबिराचे आयोजन
पुणे : पुणे महानगर परिवहन महामंडळ (पीएमपीएमएल) यांच्या स्वारगेट मुख्यालयात अधिकारी व कर्मचाऱ्यांसाठी आयोजित करण्यात आलेल्या मोफत योग व हास्ययोग शिबिरास उत्स्फूर्त प्रतिसाद लाभला. नवचैतन्य हास्ययोग परिवार, पुणे यांच्या सहकार्याने बुधवार (दि. ३ जून २०२६) रोजी या एकदिवसीय शिबिराचे आयोजन करण्यात आले होते.
या कार्यक्रमास पीएमपीएमएलचे मुख्य कार्यकारी अधिकारी विजयकुमार सरनाईक, मुख्य अभियंता राजेश कुदळे, प्रशासन अधिकारी संतोष किरवे तसेच नवचैतन्य हास्ययोग परिवाराचे मकरंद टिल्लू यांची प्रमुख उपस्थिती होती.
यावेळी मकरंद टिल्लू यांनी योगाचे दैनंदिन जीवनातील महत्त्व, नियमित योगाभ्यासामुळे होणारे शारीरिक व मानसिक आरोग्याचे फायदे तसेच हास्ययोगाच्या माध्यमातून तणावमुक्त जीवनशैली कशी अंगीकारता येते, याबाबत मार्गदर्शन केले. कर्मचाऱ्यांनी नियमित योगाभ्यास करून निरोगी जीवनशैली स्वीकारावी, असे आवाहनही त्यांनी केले. तसेच अशा आरोग्यवर्धक उपक्रमांमुळे कर्मचाऱ्यांची कार्यक्षमता वाढण्यास मदत होत असल्याचे त्यांनी नमूद केले.
शिबिरादरम्यान उपस्थित अधिकारी व कर्मचाऱ्यांनी विविध योगासने, प्राणायाम आणि हास्ययोगाच्या प्रात्यक्षिकांमध्ये उत्साहाने सहभाग घेतला. कार्यक्रमाचे सूत्रसंचालन व आभार प्रदर्शन जनसंपर्क अधिकारी नागेश गायकवाड यांनी केले.
या उपक्रमामुळे कर्मचाऱ्यांमध्ये आरोग्याविषयी जागरूकता निर्माण होण्यासह सकारात्मक आणि निरोगी कार्यसंस्कृतीला चालना मिळाल्याची भावना उपस्थितांनी व्यक्त केली.
