आमदार मनोजदादा घोरपडे यांच्या वाढदिवसानिमित्त अनोख्या पद्धतीने शुभेच्छा; खराडे गावच्या युवकाचा समाजाप्रती कृतज्ञतेचा संदेश
सातारा (मसूर ) प्रतिनिधी…..सध्या वाढदिवसांच्या निमित्ताने फलकबाजी, बॅनरबाजी आणि दिखाऊ शुभेच्छांचा ट्रेंड वाढत असताना खराडे गावचे सामाजिक कार्यकर्ते सुनील जाधव यांनी रक्तदानासारख्या जीवनदायी उपक्रमातून समाजासमोर एक प्रेरणादायी आदर्श निर्माण केला आहे. कराड उत्तरचे लोकप्रिय आमदार मनोजदादा घोरपडे यांच्या वाढदिवसानिमित्त त्यांनी रक्तदान करून शुभेच्छा अर्पण केल्या आणि सामाजिक बांधिलकीचा वेगळाच संदेश दिला.
“समाजाचे काहीतरी देणे आपण लागतो, त्यातून उतराई होण्याचा हा छोटासा प्रयत्न आहे,” अशी भावना व्यक्त करत सुनील जाधव यांनी आपले ४० वे रक्तदान पूर्ण केले. त्यांच्या या उल्लेखनीय कार्याचे सर्व स्तरांतून कौतुक होत असून युवकांनी वाढदिवस, उत्सव आणि विशेष प्रसंगी समाजोपयोगी उपक्रमांना प्राधान्य द्यावे, असा संदेशही यातून देण्यात आला.
रक्तदान हे सर्वश्रेष्ठ दान मानले जाते. एखाद्याचे प्राण वाचविण्यासाठी केलेले रक्तदान अनेक कुटुंबांसाठी आशेचा किरण ठरते. त्यामुळे सुनील जाधव यांच्या या उपक्रमामुळे वाढदिवस साजरा करण्याची विधायक आणि समाजहिताची परंपरा रुजण्यास मदत होणार असल्याची भावना उपस्थितांनी व्यक्त केली.
यावेळी जिल्हा परिषद सदस्य लालासाहेब जगदाळे, पंचायत समिती सदस्य डॉ. संतोष पाटील, पंचायत समिती सदस्या सौ. कोमल यादव, सुधीर शेळके, प्रवीण पवार, युवराज जगदाळे, संदीप जाधव, चेअरमन नथाजीराव जगदाळे तसेच आमदार मनोजदादा घोरपडे यांचे कार्यकर्ते मोठ्या संख्येने उपस्थित होते.
समाजकारण हे केवळ भाषणांपुरते मर्यादित न राहता कृतीतूनही सिद्ध करता येते, याची प्रचिती सुनील जाधव यांच्या ४० व्या रक्तदानाच्या प्रेरणादायी कार्यातून पुन्हा एकदा पाहायला मिळाली.समाजासाठी जगण्याचा संकल्प आणि रक्तदानातून मानवतेचा उत्सव, अशीच ओळख सुनील जाधव यांनी निर्माण केली आहे.
