आठवडे बाजार रद्द करण्याच्या मागणीला यश; रिपब्लिकन नेत्यांची एकीकृत सभा, भीमगीतांचा जलसा आणि खासदार चंद्रकांत हंडोरे यांची जाहीर सभा
येवला, जि. नाशिक प्रतिनिधी : महामानव डॉ. बाबासाहेब आंबेडकर यांनी १३ ऑक्टोबर १९३५ रोजी येवला येथे केलेल्या ऐतिहासिक धर्मांतर घोषणेच्या स्मरणार्थ मंगळवार, १३ ऑक्टोबर २०२६ रोजी विविध कार्यक्रमांचे आयोजन करण्यात आले आहे.
स्मारकभूमी परिसरात दुपारी १ वाजता राष्ट्रीय रिपब्लिकन पक्षाचे राष्ट्रीय अध्यक्ष अण्णासाहेब कटारे यांच्या पुढाकाराने विविध रिपब्लिकन नेत्यांची एकीकृत सभा होणार आहे. त्यापूर्वी संतोष जोंधळे व संच यांचा भीमगीतांचा जलसा रंगणार आहे. तर शनी पटांगणात सायंकाळी ५ वाजल्यापासून महाराष्ट्रातील नामांकित कलाकारांचा भीमगीतांचा जलसा आयोजित करण्यात आला असून, त्यानंतर भीमशक्ती सामाजिक संघटनेचे राष्ट्रीय अध्यक्ष खासदार चंद्रकांत हंडोरे यांची जाहीर सभा होणार आहे.
दरम्यान, धर्मांतर घोषणा दिनासाठी महाराष्ट्रातून मोठ्या संख्येने बौद्ध उपासक-उपासिका आणि भीम अनुयायी येवल्यात येत असल्याने वाहतूक कोंडी व गैरसोय टाळण्यासाठी पँथर भीमशक्तीचे नाशिक ग्रामीण जिल्हाध्यक्ष भाई महेंद्र पगारे आणि त्यांच्या सहकाऱ्यांनी १३ ऑक्टोबरचा आठवडे बाजार रद्द करण्याची मागणी केली होती. या मागणीला प्रशासनाने मंजुरी दिल्याची माहिती आहे.
या प्रयत्नांसाठी कवी-गायक विजय मोकळे करंजगावकर यांनी भाई महेंद्र पगारे आणि त्यांच्या टीमचे अभिनंदन केले आहे. धर्मांतर घोषणा दिनाच्या सर्व कार्यक्रमांना महाराष्ट्रातील बौद्ध उपासक-उपासिका, भीम अनुयायी आणि आंबेडकरी चळवळीतील कार्यकर्त्यांनी मोठ्या संख्येने उपस्थित राहावे, असे आवाहन करण्यात आले आहे.
