पारंपरिक मच्छीमारांच्या उपजीविकेच्या हक्कासाठीचा लढा सुरूच ठेवण्याचा मारुती भापकर यांचा निर्धार
पुणे, दि. १९ सप्टेंबर २०२६ : उजनी धरण क्षेत्रातील पारंपरिक मच्छीमारी व्यवसायावर ठेकेदारी पद्धतीचा निर्णय लागू करण्याच्या हालचालींना विरोध करत भोई, कोळी, आदिवासी, भिल्ल तसेच फासे पारधी समाजातील मच्छीमारांनी केलेल्या आंदोलनाला महत्त्वपूर्ण यश मिळाले आहे. संबंधित ठेकेदारी प्रक्रियेला स्थगिती देण्यात आल्याचे लेखी पत्र आंदोलकांना देण्यात आल्याची माहिती सामाजिक कार्यकर्ते मारुती भापकर यांनी दिली.
उजनी धरण क्षेत्रात पारंपरिक पद्धतीने मच्छीमारी करून उदरनिर्वाह करणाऱ्या कुटुंबांच्या उपजीविकेवर या ठेकेदारी पद्धतीमुळे परिणाम होण्याची शक्यता असल्याचा दावा आंदोलकांकडून करण्यात आला होता. या निर्णयाच्या निषेधार्थ कृष्णा खोरे विकास महामंडळ, सिंचन भवन, पुणे यांच्या कार्यालयासमोर संबंधित समाजातील महिला, युवक आणि मच्छीमारांनी आमरण उपोषण सुरू केले होते.
या आंदोलनाला पिंपरी-चिंचवडमधील सामाजिक कार्यकर्ते मारुती भापकर यांनी जाहीर पाठिंबा देत आंदोलनात सहभाग नोंदविला होता. शासनाने आंदोलनाची गांभीर्याने दखल घेतली नाही, तर पिंपरी-चिंचवड शहरातील जनचळवळी या आंदोलनात सहभागी होतील, असा इशाराही त्यांनी दिला होता.
दरम्यान, आंदोलकांच्या मागणीची दखल घेत संबंधित ठेकेदारीला स्थगिती देण्यात आल्याचे लेखी पत्र प्रशासनाकडून मिळाल्यानंतर उपोषण आंदोलन स्थगित करण्यात आले.
मात्र, ही स्थगिती म्हणजे लढ्याचा अंतिम विजय नसून पुढील काळात या निर्णयाबाबत पुन्हा हालचाली होण्याची शक्यता लक्षात घेऊन मच्छीमारांनी सतर्क राहण्याची गरज आहे, असे भापकर यांनी म्हटले आहे. भविष्यात ठेकेदारी पद्धतीने मच्छीमारीचा निर्णय पुन्हा घेण्याचा प्रयत्न झाल्यास त्याला लोकशाही मार्गाने विरोध केला जाईल, असा इशाराही त्यांनी दिला.
पारंपरिक मच्छीमारांच्या उपजीविकेच्या प्रश्नावर आंदोलनकर्त्यांच्या खांद्याला खांदा लावून संघर्ष करण्याची भूमिका कायम राहील, असे सांगत भापकर यांनी आंदोलनात सहभागी झालेल्या सर्व महिला, युवक आणि मच्छीमारांचे अभिनंदन केले.
