कचऱ्याच्या ढिगाऱ्याचे कलाकृतीत रूपांतर; धावडे वस्तीतील जी.व्ही.पी. पॉईंटचे सुशोभीकरण

‘स्वच्छता ही सेवा’ उपक्रमाला ‘वेस्ट टू आर्ट’ची जोड; महापौर रवि लांडगे यांच्या उपस्थितीत विशेष स्वच्छता मोहीम

भोसरी, दि. १९ सप्टेंबर : पिंपरी-चिंचवड महानगरपालिका आणि डिवाइन वेस्ट मॅनेजमेंट यांच्या संयुक्त विद्यमाने ‘स्वच्छता ही सेवा’ उपक्रमांतर्गत प्रभाग क्रमांक ६, धावडे वस्ती, भोसरी येथील जी.व्ही.पी. (Garbage Vulnerable Point) ठिकाणी विशेष स्वच्छता मोहीम राबविण्यात आली. कचरा हटविण्यासोबतच टाकाऊ वस्तूंच्या पुनर्वापरातून ‘वेस्ट टू आर्ट’ संकल्पना राबवून या ठिकाणाचे आकर्षक पद्धतीने सुशोभीकरण करण्यात आले.

महापौर रवि (भाऊ) लांडगे यांच्या प्रमुख उपस्थितीत झालेल्या या उपक्रमात मा. नगरसेविका डॉ. श्रद्धाताई रविभाऊ लांडगे यांच्यासह महापालिका आरोग्य विभागाचे अधिकारी, डिवाइन वेस्ट मॅनेजमेंटचे कर्मचारी आणि स्थानिक नागरिक सहभागी झाले.

जी.व्ही.पी. पॉईंट परिसरात साचलेला कचरा, प्लास्टिक व इतर टाकाऊ वस्तू हटवून परिसराची सखोल साफसफाई करण्यात आली. त्यानंतर विविध टाकाऊ वस्तूंचा कल्पकतेने पुनर्वापर करून आकर्षक सजावटीच्या कलाकृती तयार करण्यात आल्या. त्यामुळे कचरा साचणाऱ्या ठिकाणाचे स्वच्छ व सुशोभित परिसरात रूपांतर झाले.

‘कचरा नाही, संसाधन आहे’चा संदेश

‘वेस्ट टू आर्ट’च्या माध्यमातून कचऱ्याचा पुनर्वापर, पुनर्निर्मिती आणि पर्यावरण संवर्धन याबाबत नागरिकांमध्ये जनजागृती करण्यात आली. योग्य पद्धतीने वापर केल्यास टाकाऊ वस्तूंपासूनही उपयुक्त आणि कलात्मक वस्तू तयार करता येतात, हा संदेश या उपक्रमातून देण्यात आला.

यावेळी नागरिकांना सार्वजनिक ठिकाणी कचरा न टाकण्याचे, कचरा रस्त्यावर किंवा मोकळ्या जागेत न टाकता कचरा संकलन व्यवस्थेकडे देण्याचे तसेच ओला आणि सुका कचरा स्वतंत्रपणे वर्गीकृत करून देण्याचे आवाहन करण्यात आले.

नागरिकांच्या सहभागातून जी.व्ही.पी. मुक्त परिसराचा संकल्प

सार्वजनिक ठिकाणी कचरा टाकण्याची प्रवृत्ती कमी करणे, जी.व्ही.पी. मुक्त परिसर निर्माण करणे, कचरा वर्गीकरण व पुनर्वापराला चालना देणे आणि नागरिकांच्या सहभागातून स्वच्छ व सुंदर परिसर निर्माण करणे, हा या उपक्रमाचा प्रमुख उद्देश होता.

या उपक्रमास सहाय्यक आरोग्य अधिकारी श्री. वाघमारे, मुख्य आरोग्य निरीक्षक श्री. दीपक कोटियाना, आरोग्य निरीक्षक श्री. लक्ष्मण साळवे, आ. मुकादम श्री. सुरेंद्र सारसर, श्री. सुधाकर मोरे, योगिता ढाकरे, डी. के. शुक्ला, आकाश परदेशी, निखील भोसले, रोशन खडगे, डिवाइन वेस्ट मॅनेजमेंटचे कर्मचारी तसेच स्थानिक नागरिक उपस्थित होते.

‘स्वच्छ परिसर – सुंदर परिसर’ ही संकल्पना प्रत्यक्षात आणण्यासाठी नागरिकांनी सार्वजनिक स्वच्छतेची जबाबदारी स्वीकारून महापालिका प्रशासनास सहकार्य करावे, असे आवाहन यावेळी करण्यात आले.