पिंपरी, दि. १९ सप्टेंबर २०२६ : पिंपरी-चिंचवड पोलीस आयुक्तालयाच्या हद्दीत १७ व १८ सप्टेंबरदरम्यान विविध स्वरूपाचे गुन्हे दाखल झाले आहेत. यामध्ये प्राणघातक हल्ल्याचा प्रयत्न, आर्थिक फसवणूक, वाहनाचा अपहार, अपघात, मारहाण, चोरी, अमली पदार्थांचे सेवन, बेकायदा शस्त्र बाळगणे तसेच प्रतिबंधात्मक आदेशाचा भंग अशा प्रकरणांचा समावेश आहे.
तळेगाव एमआयडीसीत पिस्तूल रोखून जीवे मारण्याचा प्रयत्न केल्याचा आरोप
तळेगाव एमआयडीसी पोलीस ठाण्यात गुन्हा क्रमांक २८३/२०२६ दाखल झाला आहे. भारतीय न्याय संहिता कलम १०९(१), ३५१(३), ३३३ तसेच आर्म्स अॅक्ट कलम ३/२५ अन्वये हा गुन्हा नोंदविण्यात आला आहे. पोलिस नोंदीनुसार, १७ सप्टेंबर रोजी सुदवडी येथील डिलिव्हरी लिमिटेड कंपनीच्या चहाच्या टपरीजवळ आरोपी राजा ऊर्फ मोहम्मद नैयर मंसुरी याने फिर्यादी आदेश दुबे यांच्यावर पिस्तूल रोखून जीवे मारण्याचा प्रयत्न केल्याचा आरोप आहे. कंपनीतून काढून टाकल्याच्या रागातून हा प्रकार घडल्याचे फिर्यादीत नमूद आहे.
बँक खाते व सीमकार्डाचा गैरवापर केल्याचा आरोप
संत तुकाराम नगर पोलीस ठाण्यात गुन्हा क्रमांक ४६३/२०२६ दाखल झाला आहे. फिर्यादीच्या नावे ओला-उबेर व्यवसायासाठी सीमकार्ड व बँक खाते उघडून घेण्यात आले. त्यानंतर पासबुक, चेकबुक व एटीएम कार्ड आरोपींकडे देण्यात आल्याचे पोलिस नोंदीत म्हटले आहे. आरोपींनी संगनमत करून संबंधित खात्यावर सायबर फसवणूक व चोरीची रक्कम स्वीकारल्याचा आरोप आहे.
वाहन भाड्याने घेऊन पैसे न दिल्याचा आरोप
दक्षिण महाळुंगे पोलीस ठाण्यात गुन्हा क्रमांक ७४८/२०२६ भारतीय न्याय संहितेच्या कलम ३१६(२) अन्वये दाखल झाला आहे. फिर्यादीकडून स्विफ्ट डिझायर वाहन चार महिन्यांसाठी दरमहा २४ हजार रुपये भाड्याने घेण्यात आले. एकूण ९६ हजार रुपयांपैकी ६५ हजार रुपये देऊन उर्वरित ३१ हजार रुपये तसेच सुमारे पाच लाख रुपये किमतीचे वाहन परत न केल्याचा आरोप आरोपीवर करण्यात आला आहे.
हिंजवडीत कारच्या धडकेत दोघे जखमी
हिंजवडी पोलीस ठाण्यात गुन्हा क्रमांक ७४८/२०२६ दाखल करण्यात आला आहे. क्वाड्रॉन सर्कल, फेज-३ परिसरात कारचालकाने दुचाकीला जोरदार धडक दिल्याने फिर्यादी व त्यांचा मित्र जखमी झाल्याचे पोलिस नोंदीत नमूद आहे. या घटनेत दुचाकीचेही नुकसान झाले आहे.
एमआयडीसी भोसरीत विजेचा धक्का लागून कामगाराचा मृत्यू
एमआयडीसी भोसरी पोलीस ठाण्यात गुन्हा क्रमांक ६६०/२०२६ भारतीय न्याय संहितेच्या कलम १०६(१) अन्वये दाखल झाला आहे. फुलेनगर येथील बांधकाम साईटवर पाण्याचा निचरा करण्यासाठी कामगार खाली उतरला असताना विद्युत मोटार सुरू करण्यात आल्याने त्याला विजेचा धक्का लागला. या घटनेत सुरज शिवप्रसाद अदिवासी यांचा मृत्यू झाल्याचे पोलिस नोंदीत नमूद आहे.
निगडीत अल्पवयीन मुलाला मारहाण
निगडी पोलीस ठाण्यात गुन्हा क्रमांक ७६३/२०२६ अन्वये गुन्हा दाखल झाला आहे. साईगार्डन, संभाजीनगर परिसरात १७ वर्षीय फिर्यादीला धक्का देऊन मारहाण व शिवीगाळ केल्याचा आरोप आहे. लोखंडी कड्याने डोक्यात मारल्याने किरकोळ दुखापत झाल्याचे पोलिस नोंदीत नमूद आहे. संबंधित आरोपी विधिसंघर्षित असल्याने त्यांच्या पालकांना नोटीस बजावण्यात आल्याचेही नोंद आहे.
मोशीत घरात घुसून धमकी व मारहाण
भोसरी एमआयडीसी पोलीस ठाण्यात गुन्हा क्रमांक ६६१/२०२६ दाखल झाला आहे. मोशीतील जलवायू विहार परिसरात फिर्यादीच्या घरात जबरदस्तीने प्रवेश करून चापट मारणे तसेच वडिलांना फोन करून पैसे देण्यास सांग, अन्यथा पाहून घेण्याची धमकी दिल्याचा आरोप दोन व्यक्तींवर आहे.
बावधनमध्ये तिघांकडून मारहाण; लॅपटॉप व चष्म्याचे नुकसान
बावधन पोलीस ठाण्यात गुन्हा क्रमांक ४७६/२०२६ दाखल झाला आहे. पुराणिक अभितांते फेज-२ परिसरात तिघांनी फिर्यादीला मारहाण करून खाली पाडले. त्यातील एका व्यक्तीने हातातील कड्याने डोक्यात मारल्याने दुखापत झाली. या घटनेत ऑफिसचा लॅपटॉप व चष्म्याचे नुकसान झाल्याचे फिर्यादीत नमूद आहे.
चिखलीत कामाच्या कारणावरून लोखंडी पाईपने मारहाण
चिखली पोलीस ठाण्यात गुन्हा क्रमांक ६८५/२०२६ दाखल झाला आहे. टाटा मोटर्सच्या चिखली कार प्लांटमधील पेंट शॉपमध्ये कामाच्या कारणावरून झालेल्या वादातून एका कामगाराने लोखंडी पाईपने फिर्यादीच्या डोळ्याच्या वरील भागावर मारहाण केल्याचा आरोप आहे.
पिंपरीत रिक्षा स्टँडवरून वाद; दांडक्याने डोक्यात मारल्याचा आरोप
पिंपरी पोलीस ठाण्यात गुन्हा क्रमांक ७९३/२०२६ दाखल झाला आहे. भाजी मंडईजवळील रिक्षा स्टँडवर रिक्षा लावण्याच्या कारणावरून झालेल्या वादातून एका रिक्षाचालकाने फिर्यादीला शिवीगाळ करून लाकडी दांडक्याने डोक्यात मारल्याचा आरोप आहे.
तळेगावात कौटुंबिक कार्यक्रमादरम्यान दगडफेक
तळेगाव एमआयडीसी पोलीस ठाण्यात गुन्हा क्रमांक २८२/२०२६ दाखल झाला आहे. सुटुंबरे येथे गौरी-गणपतीच्या कार्यक्रमादरम्यान झालेल्या वादातून दगडफेक करण्यात आली. दगड फिर्यादीच्या हाताच्या करंगळीला लागून दुखापत झाल्याचे नोंदविण्यात आले आहे.
माळवाडीत मारहाण; कोयता दाखविल्याचा आरोप
तळेगाव एमआयडीसी पोलीस ठाण्यात गुन्हा क्रमांक २८५/२०२६ दाखल झाला आहे. माळवाडी-बोराडेश्वर रस्त्यावर दोन व्यक्तींनी फिर्यादी व त्यांच्या भावाला मारहाण केल्याचा आरोप आहे. आरोपींपैकी एकाने पिकअप वाहनातून कोयता काढल्याचे फिर्यादीत नमूद आहे. मारहाणीत फिर्यादीच्या हाताचे बोट फ्रॅक्चर झाल्याचे पोलिस नोंदीत म्हटले आहे.
नेहरूनगरमध्ये कोयत्याने हल्ला
संत तुकाराम नगर पोलीस ठाण्यात गुन्हा क्रमांक ४६१/२०२६ दाखल झाला आहे. जुन्या भांडणाच्या कारणावरून नेहरूनगर परिसरात फिर्यादीला शिवीगाळ करून लोखंडी कोयत्याने डाव्या हातावर मारहाण केल्याचा आरोप आहे.
पिंपरीत परवान्याशिवाय रिक्षा चालवून अपघात
पिंपरी पोलीस ठाण्यात गुन्हा क्रमांक ७९४/२०२६ दाखल झाला आहे. कराची चौक परिसरात परवान्याशिवाय रिक्षा चालविणाऱ्या चालकाने दुचाकीला धडक दिल्याने महिला व तिची तीन वर्षांची मुलगी जखमी झाल्याचे पोलिस नोंदीत नमूद आहे. या अपघातात अन्य वाहनाचेही नुकसान झाले.
जांबे परिसरातून दुचाकी चोरी
हिंजवडी पोलीस ठाण्यात गुन्हा क्रमांक ७४६/२०२६ दाखल झाला आहे. जांबे परिसरातील घरासमोरील पार्किंगमध्ये लॉक करून ठेवलेली सुमारे ३० हजार रुपये किमतीची हिरो एचएफ डिलक्स दुचाकी अज्ञात चोरट्याने चोरून नेल्याची फिर्याद आहे.
नेहरूनगरमध्ये गांजा सेवनप्रकरणी दोन स्वतंत्र गुन्हे
संत तुकाराम नगर पोलीस ठाण्यात एनडीपीएस कायद्यान्वये दोन स्वतंत्र गुन्हे दाखल करण्यात आले आहेत. एच.ए. ग्राउंड, नेहरूनगर परिसरात दोन व्यक्ती गांजा ओढण्यासाठी वापरल्या जाणाऱ्या साहित्यांसह आढळून आल्याचे पोलिस नोंदीत नमूद आहे.
निगडीत गांजा सेवनप्रकरणी गुन्हा
निगडी पोलीस ठाण्यात गुन्हा क्रमांक ७६९/२०२६ एनडीपीएस कायद्याच्या कलम ८(क), २७ व २९ अन्वये दाखल झाला आहे. निगडी स्मशानभूमीजवळ एका व्यक्तीकडे गांजा, चिलिम, लायटर व काडेपेटी आढळून आल्याचे पोलिसांनी नमूद केले आहे.
तडीपार व्यक्ती दोन पालघन हत्यारांसह आढळला
संत तुकाराम नगर पोलीस ठाण्यात गुन्हा क्रमांक ४६०/२०२६ दाखल झाला आहे. प्रतिबंधात्मक आदेश लागू असताना तसेच तडीपार आदेशाचा भंग करून एका व्यक्तीकडे दोन पालघन हत्यारे आढळल्याचे पोलिस नोंदीत नमूद आहे. संबंधित आरोपीला अटक करण्यात आली आहे.
कासारवाडीत देशी बनावटीचे पिस्तूल व काडतुसे जप्त
दापोडी पोलीस ठाण्यात गुन्हा क्रमांक ३२२/२०२६ दाखल झाला आहे. कासारवाडी परिसरात प्रतिबंधात्मक आदेश लागू असताना एका व्यक्तीकडे देशी बनावटीचे लोखंडी पिस्तूल व ११ जिवंत काडतुसे आढळून आल्याचे पोलिसांनी नमूद केले आहे. या प्रकरणात दोन आरोपी अटकेत असून एक आरोपी पाहिजे असल्याचे नोंदीत नमूद आहे.
काळेवाडीत धारदार कोयता बाळगल्याप्रकरणी गुन्हा
काळेवाडी पोलीस ठाण्यात गुन्हा क्रमांक ५०६/२०२६ दाखल झाला आहे. प्रतिबंधात्मक आदेश लागू असताना एका २२ वर्षीय व्यक्तीकडे धारदार लोखंडी कोयता विनापरवाना आढळून आल्याचा आरोप आहे. या प्रकरणात भारतीय शस्त्र अधिनियम व महाराष्ट्र पोलीस अधिनियमांतर्गत कारवाई करण्यात आली आहे.
पोलिसांच्या नोंदीनुसार, वरील सर्व प्रकरणांचा संबंधित पोलीस ठाण्यांकडून तपास सुरू आहे. आरोपींवरील आरोप हे तपासाच्या अधीन असून, न्यायालयीन निर्णय होईपर्यंत त्यांना दोषी ठरविता येणार नाही.
