प्रगत उत्पादन तंत्रज्ञानासह उद्योग क्षेत्रातील नव्या संधींचे प्रदर्शन; १७५ हून अधिक प्रदर्शकांचा सहभाग
पुणे, दि.७ सप्टेंबर २०२६ : भारताच्या उत्पादन क्षेत्राला अत्याधुनिक तंत्रज्ञानाची दिशा देणाऱ्या पुणे मशीन टूल एक्स्पो (PMTX) २०२६ आणि फॅक्टरी इक्विपमेंट एक्स्पो (FACTEQ) २०२६ चे आज मोशी येथील पुणे इंटरनॅशनल एक्झिबिशन अँड कन्व्हेन्शन सेंटर (PIECC) येथे दिमाखात उद्घाटन झाले. इंडियन मशीन टूल मॅन्युफॅक्चरर्स असोसिएशन (IMTMA) यांच्या वतीने आयोजित या प्रदर्शनात प्रगत उत्पादन तंत्रज्ञान, आधुनिक मशीन टूल्स आणि औद्योगिक उपकरणांचे सादरीकरण करण्यात आले आहे.
या प्रदर्शनाचे उद्घाटन टाटा ऑटोकॉम्प सिस्टिम्स लिमिटेडचे व्हाइस चेअरमन अरविंद गोयल यांच्या हस्ते झाले. यावेळी IMTMAच्या अध्यक्षा मोहिनी केळकर, उपाध्यक्ष विक्रम साळुंके तसेच महासंचालक व मुख्य कार्यकारी अधिकारी जिबक दासगुप्ता उपस्थित होते.
भारताने मशीन टूल उत्पादनात आत्मनिर्भर होण्याची गरज
उद्घाटनप्रसंगी अरविंद गोयल यांनी भारतातील स्थानिक उत्पादन क्षमता वाढविण्याची गरज अधोरेखित केली. भारतातील वेगाने विस्तारत असलेली उत्पादन परिसंस्था मशीन टूल उद्योगासाठी मोठ्या संधी निर्माण करीत आहे. मात्र, मशीन टूल्ससाठी मोठ्या प्रमाणावर आयातीवर अवलंबून राहणे योग्य ठरणार नाही. देशात अधिक सक्षम आणि मजबूत उत्पादन व्यवस्था उभारण्याची गरज असल्याचे त्यांनी सांगितले.
जगातील किमान तिसऱ्या क्रमांकाचा सर्वात मोठा मशीन टूल उत्पादक होण्याचे लक्ष्य भारतीय उद्योगाने ठेवावे, असे आवाहन गोयल यांनी केले.
महाराष्ट्रातील औद्योगिक परिसंस्थेला प्रदर्शनाची मोठी संधी
IMTMAच्या अध्यक्षा मोहिनी केळकर यांनी पुण्यात प्रदर्शन आयोजित करण्यामागील भूमिका स्पष्ट केली. महाराष्ट्रात भारतातील सर्वात मजबूत मशीन टूल परिसंस्थांपैकी एक असून पुणे, मुंबई, छत्रपती संभाजीनगर, नाशिक आणि कोल्हापूर या शहरांमध्ये महत्त्वाचे औद्योगिक क्लस्टर्स विकसित झाले आहेत.
पुणे हे ऑटोमोटिव्ह आणि इंजिनिअरिंग उद्योगाचे प्रमुख केंद्र असल्याने उच्च अचूकतेच्या उत्पादन तंत्रज्ञानाची मागणी मोठी आहे. ही गरज पूर्ण करण्यामध्ये मशीन टूल उद्योग महत्त्वाची भूमिका बजावत असल्याचे त्यांनी सांगितले.
महाराष्ट्रात IMTMAची मजबूत उपस्थिती असून सुमारे १८० सदस्य आहेत. गेल्या दोन दशकांपासून विविध उपक्रमांच्या माध्यमातून असोसिएशन उद्योग क्षेत्राला सातत्याने सहकार्य करत असल्याचे केळकर यांनी नमूद केले.
१८ हजारांहून अधिक अभ्यागत अपेक्षित
IMTMAचे महासंचालक व मुख्य कार्यकारी अधिकारी जिबक दासगुप्ता यांनी सांगितले की, पुणे हे विविध उत्पादन उद्योगांचे मजबूत केंद्र असल्याने या परिसरातील उत्पादन क्षेत्राशी संबंधित समुदायापर्यंत पोहोचण्यासाठी PMTX आणि FACTEQचे आयोजन करण्यात आले आहे.
या प्रदर्शनाचे एकूण क्षेत्रफळ तब्बल ११,००० चौरस मीटर असून १७५ हून अधिक प्रदर्शक, सुमारे ३०० ट्रेड डेलिगेशन आणि १८,००० हून अधिक अभ्यागत सहभागी होण्याची अपेक्षा आहे. प्रत्येक आवृत्तीसोबत प्रदर्शनाचा विस्तार होत असून मशीन टूल उत्पादक तसेच वापरकर्त्यांकडून मोठा प्रतिसाद मिळत असल्याचे दासगुप्ता यांनी सांगितले.
उद्योगांसाठी तंत्रज्ञान, नेटवर्किंग आणि व्यवसायाच्या नव्या संधी
PMTX 2026 आणि FACTEQ २०२६ च्या माध्यमातून उत्पादन उद्योगांसाठी अत्याधुनिक यंत्रसामग्री, तंत्रज्ञान, औद्योगिक उपकरणे आणि नव्या व्यावसायिक संधी एकाच छताखाली उपलब्ध झाल्या आहेत. त्यामुळे महाराष्ट्रासह देशातील उत्पादन क्षेत्राला तंत्रज्ञानाच्या नव्या टप्प्यावर नेण्यासाठी हे प्रदर्शन महत्त्वाचे व्यासपीठ ठरणार आहे.
अधिक माहितीसाठी : www.mtx.co.in | www.facteq.in
IMTMAची ८० वर्षांची उद्योगसे
इंडियन मशीन टूल मॅन्युफॅक्चरर्स असोसिएशन (IMTMA) ची स्थापना १९४६ मध्ये झाली असून ती भारतातील मशीन टूल उद्योगाची प्रमुख औद्योगिक संघटना आहे. सार्वजनिक आणि खासगी क्षेत्रातील सुमारे ५८० कंपन्या IMTMAच्या सदस्य आहेत. मेटल कटिंग व मेटल फॉर्मिंग मशीन, सब-सिस्टम्स, अॅक्सेसरीज, कटिंग टूल्स आणि संबंधित उपकरणांच्या निर्मितीशी या कंपन्या जोडलेल्या आहेत.
धोरणात्मक वकिली, ज्ञानविषयक व्यासपीठे, संशोधन अहवाल, प्रदर्शने, परिसंवाद, प्रशिक्षण आणि कौशल्य विकासाच्या माध्यमातून भारताच्या मशीन टूल उद्योगाच्या विकासाला IMTMAकडून चालना दिली जाते.
