अंमली पदार्थ विरोधी पथकाची धडक कारवाई; ७१.७२ ग्रॅम एम.डी. व १०८.७३ ग्रॅम अफिमसह ४ लाख ३० हजारांचा मुद्देमाल जप्त
पिंपरी : पिंपरी-चिंचवड पोलीस आयुक्तालयाच्या हद्दीत अंमली पदार्थांची अवैध विक्री व तस्करी रोखण्यासाठी सुरू असलेल्या कारवाईत गुन्हे शाखेच्या अंमली पदार्थ विरोधी पथकाने दोघांना ताब्यात घेतले. त्यांच्याकडून ७१ ग्रॅम ७२० मिलीग्रॅम मेफेड्रॉन (एम.डी.) आणि १०८ ग्रॅम ७३० मिलीग्रॅम अफिम, दोन मोबाईल, डिजिटल वजनकाटा आणि दुचाकी असा एकूण ४ लाख ३० हजार २५ रुपयांचा मुद्देमाल जप्त करण्यात आला.
पोलीस आयुक्त विनयकुमार चौबे यांच्या आदेशानुसार अंमली पदार्थांच्या अवैध विक्रीला आळा घालण्यासाठी विशेष मोहीम राबविण्यात येत आहे. पोलीस उपायुक्त (गुन्हे) रोहिदास पवार आणि सहायक पोलीस आयुक्त (गुन्हे-२) सचिन कदम यांच्या मार्गदर्शनाखाली अंमली पदार्थ विरोधी पथकाचे वरिष्ठ पोलीस निरीक्षक संतोष पाटील यांनी पथके तयार केली होती.
दरम्यान, पोलीस हवालदार विजय दौंडकर यांना मिळालेल्या माहितीच्या आधारे गुरुवारी (दि. ३ सप्टेंबर) सायंकाळी सव्वासहाच्या सुमारास एमआयडीसी भोसरी पोलीस ठाण्याच्या हद्दीत देहू-मोशी रोडवरील बोराटेवस्ती, मोशी येथील महालक्ष्मी फर्निचर दुकानासमोर सापळा रचून कारवाई करण्यात आली.
या कारवाईत आकाश कुमार भेराराम बिश्नोई (वय २१, रा. दुर्गापार्क, सस्तेवाडी, मोशी; मूळ राजस्थान) याच्याकडून ७१.७२ ग्रॅम एम.डी., तर प्रविण कुमार हिराराम बिश्नोई (रा. दुर्गापार्क, सस्तेवाडी, मोशी; मूळ राजस्थान) याच्याकडून १०८.७३ ग्रॅम अफिम जप्त करण्यात आले. दोघेही अंमली पदार्थ विक्रीच्या उद्देशाने बाळगत व वाहतूक करत असल्याचे पोलिसांनी सांगितले.
याप्रकरणी पिंपरी पोलीस ठाण्यात एनडीपीएस कायद्यातील कलम ८(क), १७(ब), २२(क) व २९ अन्वये गुन्हा दाखल करण्यात आला आहे.
ही कारवाई पोलीस आयुक्त विनयकुमार चौबे, सह पोलीस आयुक्त शशिकांत महावरकर, अपर पोलीस आयुक्त सारंग आवाड, पोलीस उपायुक्त रोहिदास पवार आणि सहायक पोलीस आयुक्त सचिन कदम यांच्या मार्गदर्शनाखाली वरिष्ठ पोलीस निरीक्षक संतोष पाटील, पोलीस उपनिरीक्षक जिलानी मोमीन तसेच पोलीस अंमलदार विजय दौंडकर, निखिल शेटे, कपिलेश इगवे, संतोष सपकाळ, सुभाष गुरव आणि प्रतीक कवडे यांच्या पथकाने केली.
अंमली पदार्थांविरोधात ‘झिरो टॉलरन्स’चे धोरण कायम ठेवत अशा कारवाया अधिक तीव्र करण्यात येणार असल्याचे पोलिसांनी स्पष्ट केले आहे. अंमली पदार्थांबाबत माहिती असल्यास नागरिकांनी अंमली पदार्थ विरोधी पथक, गुन्हे शाखेशी संपर्क साधावा किंवा ७७९८१००११२ या क्रमांकावर माहिती द्यावी. माहिती देणाऱ्या नागरिकाचे नाव गोपनीय ठेवण्यात येणार आहे.
