पुणे,मोशी : मोशी-आळंदी रोडवरील मोशी हॉस्पिटलसमोर, ओनकार ग्रुप एम-टू युनिटच्या गेटजवळ भरधाव ट्रेलरने दुचाकीला जोरदार धडक दिल्याची घटना १९ ऑगस्ट रोजी सायंकाळी सव्वापाचच्या सुमारास घडली. या अपघातात दुचाकीस्वार तरुणासह त्यांची आई गंभीर जखमी झाली असून, दुचाकीचेही नुकसान झाले आहे. अपघातानंतर ट्रेलरचालक घटनास्थळी न थांबता पसार झाला.
प्रकाश रामदास चांदोरे (वय ३८, रा. स्टार सिटी अपार्टमेंट, डुडूळगाव) यांनी याबाबत पोलिसांत फिर्याद दिली आहे. चांदोरे हे त्यांच्या आई नंदा रामदास चांदोरे यांच्यासह टीव्हीएस ज्युपिटर दुचाकीवरून (एमएच १४/आयडब्ल्यू ५४२६) प्रवास करीत होते. त्यावेळी अज्ञात चालकाने पांढऱ्या रंगाचा ट्रेलर भरधाव व निष्काळजीपणे चालवून दुचाकीला उजव्या बाजूने जोरदार धडक दिली.
या अपघातात नंदा चांदोरे यांच्या डोक्याला गंभीर दुखापत झाली, तर प्रकाश चांदोरे यांच्या उजव्या पायाला दुखापत झाली. तसेच दुचाकीचे नुकसान झाले. अपघातानंतर ट्रेलरचालक घटनास्थळी न थांबता वाहनासह पसार झाला.
याप्रकरणी पोलिसांनी अज्ञात ट्रेलरचालकाविरुद्ध मोटार वाहन कायदा १९८८ मधील कलम १८४, १३४, ११९/१७७ तसेच भादंवि कलम २७९, ३३७, ३३८, ४२७ अन्वये गुन्हा दाखल केला आहे. पुढील तपास पोलीस करीत आहेत.
