दिघी : हॉटेलमध्ये ग्राहकांना हुक्का उपलब्ध करून देत, त्यासाठी जळता कोळसा वापरून मानवी जीवितास धोका निर्माण केल्याप्रकरणी दिघी पोलिसांनी चौघांविरुद्ध गुन्हा दाखल केला आहे. ही कारवाई २० ऑगस्ट रोजी रात्री मॅगझीन रोड परिसरातील हॉटेल ट्री टाऊन येथे करण्यात आली.
पोलिसांनी दिलेल्या माहितीनुसार, हॉटेलमध्ये ग्राहकांना हर्बल हुक्का, तंबाखूजन्य हुक्का, स्नॅक्स, पाणी व शीतपेय उपलब्ध करून दिले जात होते. हुक्का पेटविण्यासाठी फॉईल पेपरवर जळता कोळसा ठेवण्यात आला होता. हॉटेलमध्ये हुक्क्याचा धूर व फ्लेवरचा वास पसरलेला असतानाच कर्मचारी जळता कोळसा घेऊन ग्राहकांच्या जवळून ये-जा करीत असल्याचे पोलिसांच्या निदर्शनास आले.
हॉटेलमध्ये स्वतंत्र ‘स्मोकिंग झोन’ तयार न करता ग्राहकांना जेवणाच्या टेबलवरच हुक्का पुरविला जात होता. जळत्या कोळशाच्या ठिणग्यांमुळे हॉटेलमधील लाकडी टेबल तसेच अन्य साहित्याला आग लागून मानवी जीवितास धोका निर्माण होण्याची शक्यता असतानाही निष्काळजीपणा केल्याचा आरोप पोलिसांनी केला आहे.
या प्रकरणी पोलीस शिपाई सोमनाथ बाळू बळसोडे यांनी फिर्याद दिली. त्यानुसार अक्षय तापकीर (रा. बडमुखवाडी, चऱ्होली), समशेर मन्सूर अहमद (वय २९), किशन कुमार श्रवण साहनी आणि अरबाज इम्रान अहमद (वय २०) यांच्याविरुद्ध संबंधित कायद्यानुसार गुन्हा दाखल करण्यात आला आहे.या प्रकरणाचा पुढील तपास पोलीस उपनिरीक्षक वरे करीत आहेत.
