पुणे : पिस्टल विक्रीसाठी केळेवाडी परिसरात आलेल्या २१ वर्षीय तरुणाला कोथरूड पोलिसांच्या तपास पथकाने रंगेहाथ पकडले. प्रेम देवेंद्र साळुंखे (वय २१, रा. म्हसोबा चौक, दत्तवाडी, पुणे) असे अटक केलेल्या आरोपीचे नाव आहे. त्याच्याकडून दोन पिस्टल आणि दोन जिवंत काडतुसे असा एकूण १ लाख ५० हजार रुपयांचा मुद्देमाल जप्त करण्यात आला.
दि. १९ ऑगस्ट रोजी पोलीस हवालदार शकील पठाण आणि पोलीस शिपाई शिवप्रसाद दहिफळे यांना गुप्त बातमीदारामार्फत माहिती मिळाली की, केळेवाडी येथील कुमार प्रॉपर्टीजच्या मोकळ्या जागेत, पंपिंग स्टेशनपासून काही अंतरावर पांढरा शर्ट व निळी जीन्स परिधान केलेला एक तरुण कमरेला पिस्टल लावून थांबला आहे.
ही माहिती वरिष्ठ पोलीस निरीक्षक अरुण घोडके यांना देण्यात आली. त्यांच्या सूचनेनुसार सहायक पोलीस निरीक्षक सुधीर घुले यांच्या नेतृत्वाखाली पोलिसांचे पथक पंचांसह घटनास्थळी दाखल झाले. पोलिसांनी दोन गुप्त बातमीदारांच्या माध्यमातून संशयिताकडे पिस्टल विक्रीसाठी आहे का, याची खात्री केली. त्याने पिस्टल विक्रीसाठी असल्याचे सांगताच गुप्त बातमीदाराने इशारा केला आणि पोलिसांनी त्याला ताब्यात घेतले.
पंचांसमक्ष झडती घेतली असता प्रेम साळुंखे याच्या कमरेला दोन पिस्टल आढळून आले. तसेच खिशाची तपासणी केली असता दोन जिवंत काडतुसे मिळून आली. ही शस्त्रे विक्रीसाठी आणल्याचे आरोपीने सांगितल्याचे पोलिसांनी नमूद केले आहे.
या प्रकरणी कोथरूड पोलीस ठाण्यात गुन्हा रजि. नं. ३३८/२०२६ अन्वये भारतीय हत्यार कायदा कलम ३(२५) तसेच महाराष्ट्र पोलीस अधिनियम कलम ३७(१)(३) सह १३५ प्रमाणे गुन्हा दाखल करण्यात आला आहे. आरोपीला अटक करण्यात आली असून, पुढील तपास सहायक पोलीस निरीक्षक सुधीर घुले करीत आहेत.
ही कारवाई पोलीस आयुक्त अमितेश कुमार, सह पोलीस आयुक्त संजय दराडे, अपर पोलीस आयुक्त राजेश बनसोडे, प्रभारी पोलीस उपआयुक्त परिमंडळ-३ मिलिंद मोहिते, पोलीस उपआयुक्त परिमंडळ-३ सागर कवडे आणि सहायक पोलीस आयुक्त कोथरूड विभाग सुजाता तानवडे यांच्या मार्गदर्शनाखाली करण्यात आली.
कारवाईत वरिष्ठ पोलीस निरीक्षक अरुण घोडके, पोलीस निरीक्षक (गुन्हे) अनिल माने, पोलीस निरीक्षक (गुन्हे) सुनील कारोटे, सहायक पोलीस निरीक्षक सुधीर घुले यांच्यासह पोलीस हवालदार दत्तात्रय सोनावणे, राजेंद्र लांडगे, श्रीकांत दगडे, शकील पठाण तसेच पोलीस शिपाई शिवप्रसाद दहिफळे, मयुर पांढरे, वैभव शितकाल, गणेश डोंगरे, ऋषीकेश कोळप आणि आकाश वाल्मिकी सहभागी झाले.
