पुणे, प्रतिनिधी : पारंपरिक वाद्यसंस्कृतीचे जतन, संवर्धन आणि प्रचार-प्रसार करण्याच्या उद्देशाने कार्यरत असलेल्या रुद्रांग वाद्यपथक ट्रस्ट, पुणे यांच्या दशकपूर्तीनिमित्त रविवार, २६ जुलै २०२६ रोजी सायंकाळी ६ वाजता नू. म. वि. प्रशाला, बाजीराव रोड, पुणे येथे भव्य वाद्यपूजन सोहळा व ‘पहिले आवर्तन’ कार्यक्रमाचे आयोजन करण्यात आले आहे. यासोबतच तरुणांच्या सर्जनशीलतेला प्रोत्साहन देण्यासाठी आकर्षक इन्स्टाग्राम रील स्पर्धेचेही आयोजन करण्यात आले आहे.
या सोहळ्यात पद्मश्री तारपा वादक भिकल्या लाडक्या धिंडा यांचा उच्च व तंत्र शिक्षण मंत्री तथा संसदीय कार्यमंत्री आणि पुणे जिल्ह्याचे पालकमंत्री मा. श्री. चंद्रकांतदादा पाटील यांच्या शुभहस्ते गौरव करण्यात येणार आहे. कार्यक्रमाच्या अध्यक्षस्थानी महापौर मंजुषाताई नागपुरे उपस्थित राहणार असून, अपूर्व दत्तात्रय खाडे यांचे विशेष सहकार्य लाभणार आहे.
रुद्रांग वाद्यपथक ट्रस्टचे संस्थापक-अध्यक्ष अमर लक्ष्मण भालेराव (तात्या) यांच्या संकल्पनेतून आयोजित करण्यात आलेल्या या कार्यक्रमात विविध पारंपरिक वाद्यांचे पूजन, सांस्कृतिक सादरीकरणे आणि वाद्यप्रेमींचा सहभाग हे मुख्य आकर्षण ठरणार आहे.
दशकपूर्ती सोहळ्यानिमित्त ट्रस्टतर्फे आयोजित करण्यात आलेल्या इन्स्टाग्राम रील स्पर्धेत प्रथम क्रमांकासाठी ₹५,००१, द्वितीय ₹३,००१ आणि तृतीय ₹२,००१ तसेच आकर्षक ट्रॉफी प्रदान करण्यात येणार आहे. स्पर्धकांनी आपली रील ट्रस्टच्या अधिकृत इन्स्टाग्राम पेजसोबत Collaboration करून पोस्ट करणे आवश्यक असून, स्पर्धेचा निकाल २८ जुलै २०२६ रोजी जाहीर करण्यात येणार आहे. या स्पर्धेसाठी प्रवेश पूर्णपणे मोफत आहे.
रुद्रांग वाद्यपथक ट्रस्टने पुणे शहरातील सर्व वाद्यप्रेमी, गणेशोत्सव मंडळांचे पदाधिकारी, वादक तसेच नागरिकांनी मोठ्या संख्येने उपस्थित राहून दशकपूर्ती सोहळा यशस्वी करावा, असे आवाहन केले आहे.
