पिंपरी-चिंचवड गुन्हे शाखेच्या खंडणी विरोधी पथकाची धडाकेबाज कारवाई; निगडी पोलिसांच्या ताब्यात दिला आरोपी
पिंपरी-चिंचवड, दि. २२ जुलै : पिंपरी-चिंचवड पोलीस आयुक्तालयाच्या गुन्हे शाखेतील खंडणी विरोधी पथकाने बलात्कार व पॉक्सो कायद्यान्वये दाखल असलेल्या गंभीर गुन्ह्यात तब्बल दहा वर्षांपासून फरार असलेल्या आरोपीला कर्नाटक राज्यातून शोधून काढत अटक करण्याची उल्लेखनीय कामगिरी केली आहे.
निगडी पोलीस ठाण्यात २०१६ साली गुन्हा रजिस्टर क्रमांक ७२६/२०१६ अन्वये भारतीय दंड विधान कलम ३७६ तसेच पॉक्सो कायद्याच्या कलम ४ व ५(जे)(२) अंतर्गत गुन्हा दाखल करण्यात आला होता. या गुन्ह्यातील आरोपी हनुमंत दुर्गाप्पा कुन्हाडे हा गुन्हा दाखल झाल्यापासून फरार होता. गेल्या दहा वर्षांपासून पोलिसांना त्याचा माग काढता आला नव्हता.
दरम्यान, खंडणी विरोधी पथकातील पोलीस हवालदार रमेश मावसकर यांना गुप्त बातमीदारामार्फत आरोपी कर्नाटक राज्यात वास्तव्यास असल्याची माहिती मिळाली. त्यानंतर पोलीस उपनिरीक्षक सुनिल कानगुडे यांनी आरोपीच्या मोबाईल क्रमांकाचे तांत्रिक विश्लेषण करून तो कुरागुंड, ता. राणेबेन्नूर, जि. हावेरी (कर्नाटक) येथे असल्याचे निश्चित केले.
या माहितीच्या आधारे पोलीस उपआयुक्त (गुन्हे) रोहिदास पवार यांच्या मार्गदर्शनाखाली तसेच खंडणी विरोधी पथकाचे वरिष्ठ पोलीस निरीक्षक राजेंद्र पाटील यांच्या नेतृत्वाखाली सहाय्यक पोलीस उपनिरीक्षक गायकवाड, पोलीस हवालदार रमेश मावसकर, भूपेंद्र चौधरी आणि पोलीस शिपाई निलेश जाधव यांच्या विशेष पथकाने कर्नाटकमध्ये जाऊन आरोपीला ताब्यात घेतले. वैद्यकीय तपासणीनंतर आरोपीला पुढील कायदेशीर कारवाईसाठी निगडी पोलीस ठाण्याच्या ताब्यात देण्यात आले.गंभीर स्वरूपाच्या गुन्ह्यातील फरार आरोपीला तब्बल दहा वर्षांनंतर अटक करण्यात आल्याने गुन्हे शाखेच्या या कारवाईचे कौतुक होत आहे.
ही कारवाई पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपआयुक्त (गुन्हे) रोहिदास पवार तसेच सहाय्यक पोलीस आयुक्त (गुन्हे-२) सचिन कदम यांच्या मार्गदर्शनाखाली खंडणी विरोधी पथकाने यशस्वीरीत्या पार पाडली.
