इंदापूर प्रतिनिधी ….इंदापूर तालुक्यातील कळंब येथील विश्वासराव रणसिंग महाविद्यालयातील मराठी विभागाचे सहाय्यक प्राध्यापक डॉ. राजकुमार शेलार यांना युगप्रवर्तक श्री शाहू बहुउद्देशीय सेवा संस्था, महाराष्ट्र राज्य यांच्या वतीने लोकराजा राजश्री छत्रपती शाहू महाराज यांच्या जयंतीनिमित्त प्रदान करण्यात येणारा प्रतिष्ठेचा ‘राजश्री शाहू पुरस्कार २०२६’ प्रदान करण्यात आला. राजकारण, समाजकार्य, शिक्षण व शैक्षणिक क्षेत्रात उल्लेखनीय आणि भरीव योगदान देणाऱ्या व्यक्तींना हा पुरस्कार दिला जातो.
डॉ. शेलार यांनी भगवान इंगळे यांच्या ‘ढोर’ या दलित आत्मकथनावर एम.फिल. पदवी संपादन केली असून, ‘भटक्या-विमुक्त जमातींची आत्मकथने : स्वरूप आणि चिकित्सा’ या विषयावर सावित्रीबाई फुले पुणे विद्यापीठातून पीएच.डी. प्राप्त केली आहे. त्यांच्या ‘दलित आत्मकथने आणि भगवान इंगळे यांचे ‘ढोर’ आत्मकथन’ या ग्रंथाला ‘साहित्यरत्न लोकशाहीर अण्णाभाऊ साठे राष्ट्रीय वाङ्मय पुरस्कार’ प्राप्त झाला आहे. राष्ट्र सेवा दल तसेच इंदापूर शहर नागरी संघर्ष समितीनेही त्यांच्या साहित्यिक व सामाजिक योगदानाचा गौरव करून त्यांचा नागरी सत्कार केला आहे.
त्यांच्या संशोधन, साहित्यनिर्मिती आणि समाजप्रबोधनाच्या कार्याची दखल घेत ज्येष्ठ विचारवंत, इतिहास संशोधक व व्याख्याते डॉ. श्रीमंत कोकाटे यांच्या हस्ते त्यांना हा पुरस्कार प्रदान करण्यात आला. यावेळी कैलास कदम, प्रा. कृष्णा ताटे, आजी-माजी नगरसेवक, समाजसेवक तसेच विविध क्षेत्रांतील मान्यवर उपस्थित होते.
पुरस्कार स्वीकारल्यानंतर मनोगत व्यक्त करताना डॉ. शेलार म्हणाले, “‘राजश्री शाहू महाराज पुरस्कार’ स्वीकारताना माझे मन आनंद, अभिमान आणि कृतज्ञतेने भरून आले आहे. हा पुरस्कार केवळ माझा सन्मान नसून शिक्षक आणि प्राध्यापक म्हणून समाजाप्रती असलेल्या जबाबदारीची जाणीव अधिक दृढ करणारा आहे. युगप्रवर्तक श्री शाहू बहुउद्देशीय सेवा संस्था, महाराष्ट्र राज्य तसेच संस्थेचे अध्यक्ष पत्रकार शिवाजी शिंदे यांचे मी मनःपूर्वक आभार मानतो. राजश्री छत्रपती शाहू महाराज यांनी समता, सामाजिक न्याय, शिक्षण आणि मानवतेची जी मूल्ये समाजासमोर ठेवली, त्यांचा वारसा जपत शिक्षणाच्या माध्यमातून समाजप्रबोधन करण्याचा माझा प्रयत्न कायम राहील. पुढील काळातही शिक्षण, संशोधन, साहित्यनिर्मिती आणि समाजहिताची कार्ये अधिक समर्पितपणे करण्याचा मी प्रयत्न करीन.”
डॉ. शेलार यांना हा प्रतिष्ठेचा पुरस्कार प्राप्त झाल्याबद्दल इंदापूर तालुका ग्रामविकास प्रतिष्ठानच्या अध्यक्षा आनंदी रणसिंग, उपाध्यक्ष प्रकाश कदम, सचिव वीरसिंह भैय्यासाहेब रणसिंग, महाविद्यालयाचे प्राचार्य डॉ. अशोक काळंगे, उपप्राचार्य प्रा. ज्ञानेश्वर गुळीग, डॉ. प्रशांत शिंदे, सर्व प्राध्यापक तसेच राजकीय, सामाजिक आणि शैक्षणिक क्षेत्रातील मान्यवरांनी त्यांचे अभिनंदन करून पुढील वाटचालीस शुभेच्छा दिल्या.
