अचानक उपस्थिती तपासणी; वेळेचे पालन न करणाऱ्या अधिकारी-कर्मचाऱ्यांवर प्रशासनाचा दंडुका
वैजापूर | प्रतिनिधी विजयकुमार मोकळे …..वैजापूर पंचायत समितीतील अधिकारी आणि कर्मचाऱ्यांच्या वेळेवर उपस्थितीबाबत वारंवार तक्रारी येत असल्याच्या पार्श्वभूमीवर पंचायत समितीच्या सभापती वंदना बाळू शिंदे यांनी सोमवारी अचानक उपस्थिती तपासणी करत प्रशासनाला सतर्क केले. या कारवाईनंतर उशिरा कार्यालयात येणाऱ्या काही अधिकारी-कर्मचाऱ्यांना कारणे दाखवा नोटिसा बजावण्यात आल्या.
सभापती वंदना शिंदे यांनी माजी उपसभापती प्रभाकर बारसे आणि सदस्य राहुल लांडे यांच्या उपस्थितीत पंचायत समिती कार्यालयात अचानक भेट दिली. त्यांनी गटविकास अधिकाऱ्यांच्या दालनात जाऊन हजेरी रजिस्टर ताब्यात घेतले आणि अधिकारी-कर्मचाऱ्यांच्या उपस्थितीची पाहणी केली. कार्यालय सुरू होण्याची वेळ उलटल्यानंतरही सकाळी साडेदहा वाजेपर्यंत अनेक कर्मचारी आणि अधिकारी टप्प्याटप्प्याने कार्यालयात दाखल होत असल्याचे निदर्शनास आले.
दरम्यान, गटविकास अधिकारी ज्ञानेदेव (नामदेव) जायभाये हे उपविभागीय कार्यालयातील बैठकीसाठी बाहेर गेले होते. बैठकीवरून परतल्यानंतर त्यांनी तातडीने चौकशी करून विस्तार अधिकारी अमेय पवार, बी. आर. मस्के, रॉयल धुळे तसेच अभियंता मनोज उडान यांना कारणे दाखवा नोटिसा बजावल्या.
याबाबत गटविकास अधिकारी जायभाये यांनी सांगितले की, अधिकारी आणि कर्मचाऱ्यांनी कार्यालयीन वेळेचे काटेकोर पालन करणे आवश्यक आहे. नियमांचे उल्लंघन करणाऱ्यांविरोधात शिस्तभंगाची कारवाई करण्यात येत असून, भविष्यातही अशा प्रकारांवर कठोर भूमिका घेतली जाईल.
सभापती वंदना शिंदे यांनी सांगितले की, पंचायत समितीत दररोज विविध कामांसाठी सर्वसामान्य नागरिक येत असतात. मात्र, अधिकारी वेळेवर उपस्थित नसल्यामुळे नागरिकांना तासन्तास प्रतीक्षा करावी लागते. यापूर्वी सूचना देऊनही परिस्थितीत सुधारणा न झाल्याने ही बाब प्रशासनाच्या निदर्शनास आणून देत कारवाई करण्यात आली.
या कारवाईनंतर वैजापूर तालुक्यात सभापती वंदना शिंदे यांच्या पुढाकाराचे नागरिकांकडून स्वागत होत असून, अधिकारी-कर्मचाऱ्यांवर प्रशासनाचा वचक राहिल्यास सर्वसामान्यांची कामे अधिक वेगाने आणि सुरळीत होतील, अशी अपेक्षा व्यक्त केली जात आहे.
