अग्निशमन दल व पोलिसांच्या तत्परतेमुळे तिन्ही घटनांमध्ये जीवितहानी टळली
पुणे : प्रतिनिधी...शहरात सुरू असलेल्या मुसळधार पावसाने सोमवारी जनजीवन विस्कळीत केले. शहरातील विविध भागांत घडलेल्या तीन वेगवेगळ्या दुर्घटनांमध्ये जुना वाडा कोसळणे, मोठे झाड घरांवर पडणे आणि अंडरपासमध्ये कार अडकणे अशा घटना घडल्या. मात्र, अग्निशमन दल आणि पोलिसांच्या तातडीच्या प्रतिसादामुळे तिन्ही घटनांमध्ये कोणतीही जीवितहानी झाली नाही.
सोमवार पेठेतील धनगर गल्ली येथे दुमजली जुना वाडा अचानक कोसळल्याने परिसरात एकच खळबळ उडाली. घटनेची माहिती मिळताच पुणे अग्निशमन दलाचे जवान तातडीने घटनास्थळी दाखल झाले. परिसराची पाहणी करून सुरक्षेच्या दृष्टीने आवश्यक उपाययोजना करण्यात आल्या. सुदैवाने दुर्घटनेत कोणालाही दुखापत झाली नाही.
दुसरी घटना घोरपडी गाव परिसरात घडली. मुसळधार पावसामुळे एक विशाल पिंपळाचे झाड उन्मळून थेट सात ते आठ घरांवर कोसळले. या घटनेत घरांचे नुकसान झाले असले, तरी कोणतीही जीवितहानी झाली नाही. अग्निशमन दलाने तातडीने झाड हटविण्याचे काम हाती घेत परिसर पूर्ववत करण्याचे प्रयत्न सुरू केले.
दरम्यान, पोल्ट्री अंडरपासमध्ये साचलेल्या पाण्याचा अंदाज न आल्याने एका कारचालकाचे वाहन पाण्यात अडकले. त्यावेळी बंदोबस्तावर असलेले पोलीस कर्मचारी पवार आणि पोलीस हवालदार बांबळे यांनी प्रसंगावधान राखत चालकाला सुखरूप बाहेर काढले. त्यानंतर वरिष्ठ अधिकाऱ्यांच्या उपस्थितीत सरकारी वाहनाच्या साहाय्याने अडकलेली कारही सुरक्षितपणे बाहेर काढण्यात आली.
सतत सुरू असलेल्या पावसामुळे शहरातील सखल भाग, अंडरपास आणि जीर्ण इमारतींच्या परिसरात धोका वाढला आहे. त्यामुळे नागरिकांनी अनावश्यक प्रवास टाळावा, पाणी साचलेल्या ठिकाणी वाहन नेण्याचे धाडस करू नये आणि प्रशासनाच्या सूचनांचे काटेकोर पालन करावे, असे आवाहन प्रशासनाकडून करण्यात आले आहे.
