मेडिकव्हर व साईनाथ रुग्णालयात जाऊन जखमींची विचारपूस; अधिकाऱ्यांना तातडीच्या उपचारांसह सर्व प्रशासकीय मदतीच्या सूचना
पिंपरी, दि. १० जुलै २०२६ : मोशी येथील वेस्ट टू एनर्जी प्रकल्प परिसरात घडलेल्या दुर्दैवी दुर्घटनेतील जखमी नागरिकांची पिंपरी-चिंचवड महानगरपालिकेचे महापौर रवि लांडगे यांनी शुक्रवारी मेडिकव्हर हॉस्पिटल आणि साईनाथ हॉस्पिटल येथे जाऊन भेट घेत त्यांच्या प्रकृतीची विचारपूस केली. यावेळी त्यांनी जखमी व त्यांच्या कुटुंबीयांशी संवाद साधत मानसिक धीर दिला आणि महानगरपालिका त्यांच्या पाठीशी ठामपणे उभी असल्याची ग्वाही दिली.
भेटीदरम्यान साईनाथ हॉस्पिटलचे प्रमुख तथा नगरसदस्य डॉ. सुहास कांबळे, महापालिकेतील संबंधित अधिकारी आणि वैद्यकीय अधिकाऱ्यांकडून प्रत्येक जखमीच्या प्रकृतीची सविस्तर माहिती महापौरांनी घेतली. जखमींना सर्वोत्तम आणि तातडीचे उपचार मिळावेत, उपचारात कोणतीही त्रुटी राहू नये तसेच आवश्यक असलेला सर्व शासकीय समन्वय तातडीने पूर्ण करावा, अशा स्पष्ट सूचना त्यांनी संबंधित अधिकाऱ्यांना दिल्या.
याशिवाय, प्रत्येक बाधित कुटुंबाला आवश्यक ती मदत तातडीने उपलब्ध करून देण्याचे निर्देशही महापौरांनी प्रशासनाला दिले.
यावेळी महापौर रवि लांडगे म्हणाले, “ही दुर्घटना अत्यंत वेदनादायी असून प्रत्येक बाधित कुटुंबाच्या दुःखात आम्ही सहभागी आहोत. नागरिकांचे प्राण आणि सुरक्षितता हीच आमची सर्वोच्च जबाबदारी आहे. जखमींना सर्वोत्तम उपचार मिळावेत, त्यांच्या कुटुंबियांना कोणतीही अडचण येऊ नये आणि आवश्यक त्या प्रत्येक स्तरावर महानगरपालिका त्यांच्या सोबत राहील. या संकटाच्या काळात संपूर्ण प्रशासन प्रत्येक बाधित कुटुंबाच्या पाठीशी खंबीरपणे उभे आहे.”
दुर्घटनेतील सर्व जखमी नागरिकांनी लवकरात लवकर पूर्णपणे बरे व्हावे आणि त्यांच्या कुटुंबियांना या कठीण प्रसंगाला सामोरे जाण्याचे बळ मिळावे, अशी प्रार्थनाही महापौरांनी व्यक्त केली.
दरम्यान, पिंपरी-चिंचवड महानगरपालिका प्रशासनाकडून बचावकार्य, वैद्यकीय उपचार, समन्वय आणि आवश्यक प्रशासकीय मदत प्राधान्याने सुरू असून, बाधित नागरिकांना सर्वतोपरी सहकार्य करण्यासाठी संपूर्ण यंत्रणा युद्धपातळीवर कार्यरत असल्याचे प्रशासनाने स्पष्ट केले.
