पिंपरी-चिंचवड वाहतूक शाखेची प्रभावी कारवाई; व्हॉट्सॲप चॅटबॉटद्वारे नागरिकांना तात्काळ प्रतिसाद
पिंपरी-चिंचवड : पिंपरी-चिंचवड पोलीस आयुक्तालयाच्या वाहतूक शाखेने नागरिकांच्या वाहतूकविषयक तक्रारींचे त्वरित निराकरण करण्यासाठी सुरू केलेल्या ‘ट्राफिक बडी’ या ऑनलाइन व्हॉट्सॲप चॅटबॉट उपक्रमाला नागरिकांचा उत्स्फूर्त प्रतिसाद मिळत आहे. जून २०२६ या एकाच महिन्यात या माध्यमातून प्राप्त झालेल्या १,६३८ तक्रारींचा यशस्वी निपटारा करण्यात आला आहे.
पोलीस आयुक्त विनयकुमार चौबे यांच्या आदेशानुसार, पोलीस सहआयुक्त शशिकांत महावरकर तसेच अपर पोलीस आयुक्त सारंग आवाड यांच्या मार्गदर्शनाखाली पिंपरी-चिंचवड पोलीस आयुक्तालयाच्या कार्यक्षेत्रात ‘ट्राफिक बडी’ हा ऑनलाइन व्हॉट्सॲप चॅटबॉट सुरू करण्यात आला आहे. या उपक्रमाचा उद्देश नागरिकांना वाहतूक कोंडी, वाहतूक नियमन तसेच इतर वाहतूक समस्यांबाबत त्वरित मदत उपलब्ध करून देणे हा आहे.
वाहतूक शाखेच्या माहितीनुसार, जून महिन्यात प्राप्त झालेल्या एकूण १,६३८ तक्रारींचे प्रभावीपणे निराकरण करण्यात आले असून, त्यामुळे नागरिकांना मोठा दिलासा मिळाला आहे. या उपक्रमामुळे वाहतूक व्यवस्थापन अधिक गतिमान आणि नागरिकाभिमुख होत असल्याचे दिसून येत आहे.
यावेळी वाहतूक विभागाचे पोलीस उपायुक्त विक्रांत देशमुख यांनी नागरिकांना आवाहन केले आहे की, वाहतूक कोंडी, वाहतूक नियमन किंवा इतर वाहतूकविषयक अडचणी असल्यास ‘ट्राफिक बडी’ व्हॉट्सॲप चॅटबॉट (क्रमांक : ८७८८६४९८८५) चा जास्तीत जास्त वापर करून आपल्या तक्रारी नोंदवाव्यात. नागरिकांच्या सहकार्यामुळे वाहतूक व्यवस्थापन अधिक सक्षम आणि प्रभावी होण्यास मदत होणार असल्याचे त्यांनी सांगितले.
