पुणे, दि. ३ जुलै : पावसादरम्यान पुण्यातील गोखले नगर परिसरात जीबी स्पोर्ट क्लबच्या कार्यालयाजवळ असलेल्या वीज वितरणाच्या डीपीला (डिस्ट्रिब्युशन ट्रान्सफॉर्मर) अचानक भीषण आग लागल्याची घटना घडली. आग लागल्यानंतर काही क्षणांतच डीपीमधून फटाक्यांसारखे जोरदार स्फोट होऊ लागल्याने परिसरात घबराट पसरली.
घटनेच्या वेळी डीपीच्या अगदी शेजारी अनेक दुचाकी उभ्या होत्या. त्यामुळे आग आणखी भडकून मोठी दुर्घटना घडण्याची शक्यता निर्माण झाली होती. मात्र, प्रसंगावधान राखत काही धाडसी नागरिकांनी तत्काळ दुचाकी सुरक्षित ठिकाणी हलवल्याने संभाव्य मोठा अनर्थ टळला.
या घटनेचा थरारक व्हिडिओ सध्या सोशल मीडियावर मोठ्या प्रमाणात व्हायरल होत आहे. सुदैवाने या आगीत कोणतीही जीवितहानी झाल्याची माहिती समोर आलेली नाही.
दरम्यान, पावसाळ्यात वीज वितरण यंत्रणांची नियमित तपासणी व देखभाल करण्याची आवश्यकता या घटनेमुळे पुन्हा एकदा अधोरेखित झाली आहे. आग नेमकी कशामुळे लागली, याचा तपास संबंधित यंत्रणांकडून केला जात आहे.
