पुणे, प्रतिनिधी : बावधन परिसरात जमिनीच्या विक्री एजन्सीच्या वादातून एका व्यक्तीवर दगडाने जीवघेणा हल्ला झाल्याची घटना घडली आहे. याप्रकरणी बावधन पोलिसांनी गुन्हा दाखल करून एका आरोपीला अटक केली आहे.
पोलिसांनी दिलेल्या माहितीनुसार, हा प्रकार २८ जून २०२६ रोजी सायंकाळी साडेसहा वाजण्याच्या सुमारास भुगाव रोडवरील जिजाई बँकेजवळील मोकळ्या जागेत घडला. या प्रकरणी विनय किसन जोरी (वय ३९, रा. गुजरात कॉलनी, कोथरूड, पुणे, मूळ गाव भावस, ता. मुळशी) यांनी फिर्याद दिली आहे.
फिर्यादी आणि आरोपी यांच्यात पूर्वी झालेला वाद तसेच जमिनीच्या विक्री एजन्सीच्या कारणावरून झालेल्या वादातून आरोपी सुनीत ऊर्फ बंदू विष्णू नोरी (वय ४०, रा. वारजे, पुणे) याने फिर्यादी व त्यांचे सासरे अनिल हिरामण लवाई यांना शिवीगाळ करून जीवे मारण्याची धमकी दिली. त्यानंतर दगडाने डोक्यात मारहाण करून गंभीर जखमी केल्याचा आरोप फिर्यादीत करण्यात आला आहे.
या प्रकरणी बावधन पोलीस ठाण्यात गुन्हा क्रमांक २७१/२०२६ अन्वये भारतीय न्याय संहिता (BNS) कलम ११८(२), ११५(२), ३५२ व ३५१(२) नुसार गुन्हा दाखल करण्यात आला असून आरोपीला अटक करण्यात आली आहे. पुढील तपास पोलीस उपनिरीक्षक बोरबोले करीत आहेत.
