पिंपरी, दि.०३ जुलै (प्रतिनिधी) – पिंपरी-चिंचवड महानगरपालिका आणि आकांक्षा फाउंडेशन यांच्या संयुक्त विद्यमाने चालविण्यात येणाऱ्या इंग्रजी माध्यमाच्या शाळांतील सुमारे १,२८० विद्यार्थ्यांना शैक्षणिक वर्ष सुरू होऊन १५ दिवसांहून अधिक कालावधी उलटूनही पाठ्यपुस्तके उपलब्ध न झाल्याची गंभीर बाब समोर आली आहे. याप्रकरणी विद्यार्थ्यांना तात्काळ पाठ्यपुस्तके उपलब्ध करून देण्याबरोबरच जबाबदार अधिकारी व कर्मचाऱ्यांवर कठोर कारवाई करण्याची मागणी नगरसेवक संदीप वाघेरे यांनी महापालिका आयुक्तांकडे निवेदनाद्वारे केली आहे.
महापालिका व आकांक्षा फाउंडेशन यांच्या माध्यमातून सन २०१३ पासून कै. अनुसया नामदेव वाघेरे इंग्लिश मिडियम शाळा, कै. दत्तोबा रामचंद्र काळे इंग्लिश मिडियम शाळा आणि पीसीएमसी बोपखेल इंग्लिश मिडियम शाळांमध्ये इयत्ता पहिली ते आठवीपर्यंत आर्थिकदृष्ट्या दुर्बल व गरजू विद्यार्थ्यांना मोफत आणि गुणवत्तापूर्ण शिक्षण दिले जाते. या शाळांनी सातत्याने उत्कृष्ट शैक्षणिक कामगिरी करत दहावीचा १०० टक्के निकाल कायम राखला असून विद्यार्थ्यांच्या सर्वांगीण विकासासाठी विविध उपक्रम राबविले जात आहेत.
मात्र, मागील दोन वर्षांपासून शाळांकडून वेळेत मागणी करूनही संबंधित विभागाकडून पाठ्यपुस्तकांचा पुरवठा वेळेवर होत नसल्याचा आरोप निवेदनात करण्यात आला आहे. यंदाही शाळा सुरू होऊन १५ दिवसांहून अधिक कालावधी लोटला असतानाही विद्यार्थ्यांना पाठ्यपुस्तके मिळालेली नसल्याने नियमित अध्यापनावर परिणाम होत असून विद्यार्थ्यांचे शैक्षणिक नुकसान होत असल्याचे वाघेरे यांनी नमूद केले आहे.
निवेदनात संबंधित विभागाला तातडीने सर्व विद्यार्थ्यांना पाठ्यपुस्तके उपलब्ध करून देण्याचे निर्देश द्यावेत, तसेच वेळेत मागणी प्राप्त होऊनही पुरवठा न करणाऱ्या अधिकारी व कर्मचाऱ्यांची जबाबदारी निश्चित करून त्यांच्यावर प्रशासकीय व शिस्तभंगाची कारवाई करावी, अशी मागणी करण्यात आली आहे.
याशिवाय भविष्यात अशा प्रकारचा निष्काळजीपणा पुन्हा होऊ नये, यासाठी आवश्यक उपाययोजना करून विद्यार्थ्यांच्या शैक्षणिक हिताला सर्वोच्च प्राधान्य देण्याची अपेक्षाही निवेदनातून व्यक्त करण्यात आली आहे.
याबाबत नगरसेवक संदीप वाघेरे म्हणाले, “गरीब व होतकरू विद्यार्थ्यांना दर्जेदार शिक्षण मिळावे हा या शाळांचा मूलभूत उद्देश आहे. मात्र, वेळेत पाठ्यपुस्तके उपलब्ध न होणे ही अत्यंत गंभीर बाब आहे. विद्यार्थ्यांच्या शिक्षणाशी कोणत्याही प्रकारची तडजोड स्वीकारली जाणार नाही. प्रशासनाने तात्काळ पाठ्यपुस्तके उपलब्ध करून दोषींवर कठोर कारवाई करावी.”
