चाकण, प्रतिनिधी : दोन लाख रुपयांच्या खंडणीसाठी केटरिंग व्यावसायिकाचे अपहरण करून मारहाण, जीवे मारण्याची धमकी आणि दुचाकी हिसकावून घेतल्याप्रकरणी चाकण पोलिसांनी चार जणांना अटक केली आहे. या प्रकरणी चाकण पोलीस ठाण्यात गुन्हा क्रमांक ५४९/२०२६ दाखल करण्यात आला आहे.
फिर्यादी वामोदर अंगद यादव (वय ३६, व्यवसाय – केटरिंग, सध्या रा. वाकी, ता. खेड, मूळ रा. बीड) यांनी दिलेल्या फिर्यादीनुसार, २० मे ते २५ जून २०२६ या कालावधीत आरोपींनी त्यांच्याकडे दोन लाख रुपयांची खंडणी मागितली.
पोलिसांनी दिलेल्या माहितीनुसार, मुख्य आरोपी सनी वैजीनाथ उघडे याने मोबाईलवर संपर्क साधून, “दोन मुलींची छेड काढली असून त्या माझ्याकडे आहेत. पोलीस तक्रार होऊ नये यासाठी दोन लाख रुपये द्यावे लागतील,” अशी धमकी दिली. फिर्यादीने पैसे देण्यास असमर्थता दर्शविल्यानंतर आरोपींनी त्यांना वारंवार जीवे मारण्याची धमकी दिली.
यानंतर आरोपींनी फिर्यादीचे जबरदस्तीने अपहरण करून रिक्षामध्ये नेले. बेल्ट व हाताने मारहाण करत धारदार शस्त्राचा धाक दाखवून दोन लाख रुपयांची मागणी केली. पैसे नसल्याचे सांगितल्यावर फिर्यादीला त्यांच्या केटरिंगच्या ग्राहकांकडे नेऊन पैसे उभे करण्यास भाग पाडण्यात आले.
या दरम्यान आरोपींनी रोख ४५ हजार रुपये तसेच स्कॅनरद्वारे ऑनलाइन १० हजार ९५० रुपये खंडणी म्हणून उकळल्याचा आरोप आहे. तसेच फिर्यादीची हिरो स्प्लेंडर प्लस (एमएच-१४-एनसी-१६३६) दुचाकीही जबरदस्तीने घेऊन आणखी खंडणीची मागणी केल्याचे फिर्यादीत नमूद आहे.
या प्रकरणी सनी वैजीनाथ उघडे (वय १९), अनिकेत पुरुषोत्तम ढोले (वय २१), रवी संतोष परपरमोल (वय १८) आणि प्रेम गिरीष अंकुश (वय २१) या चौघांना अटक करण्यात आली असून पुढील तपास पोलीस उपनिरीक्षक कदम करीत आहेत.
