यवतमाळ, प्रतिनिधी :…अवैधरित्या गावठी बनावटीचे देशी पिस्तूल बाळगून फिरणाऱ्या एका आरोपीला स्थानिक गुन्हे शाखेच्या (एलसीबी) पथकाने महागाव पोलीस ठाण्याच्या हद्दीत अटक केली. आरोपीकडून एक गावठी देशी पिस्तूल आणि एक जिवंत काडतूस असा एकूण 31 हजार रुपयांचा मुद्देमाल जप्त करण्यात आला.
पोलिस सूत्रांनी दिलेल्या माहितीनुसार यवतमाळचे पोलीस अधीक्षक कुमार चिंता यांच्या मार्गदर्शनाखाली स्थानिक गुन्हे शाखेचे पथक आरोपी शोध मोहिमेवर असताना गुप्त माहिती मिळाली. आंबोडा गावाजवळील तुळजापूर–नागपूर राष्ट्रीय महामार्गावरील एका हॉटेल परिसरात एक व्यक्ती गावठी पिस्तूल घेऊन फिरत असल्याची माहिती मिळताच पथकाने तातडीने सापळा रचून संशयिताला ताब्यात घेतले.
चौकशीदरम्यान आरोपीने आपले नाव रवि संतोष शिंगारे (वय २९, रा. धर्मनगर, श्रीरामपूर, ता. पुसद, जि. यवतमाळ) असे सांगितले. त्याची अंगझडती घेतली असता त्याच्याकडून अंदाजे ३० हजार रुपये किमतीचे गावठी बनावटीचे देशी पिस्तूल आणि १ हजार रुपये किमतीचे एक जिवंत काडतूस जप्त करण्यात आले.
याप्रकरणी महागाव पोलीस ठाण्यात आरोपीविरुद्ध गुन्हा क्रमांक ३२०/२०२६ नोंद करण्यात आला असून भारतीय हत्यार कायदा कलम ३ व २५ अन्वये गुन्हा दाखल करण्यात आला आहे. पुढील तपास महागाव पोलीस करीत आहेत.
ही कारवाई पोलीस अधीक्षक कुमार चिंता,अप्पर पोलीस अधीक्षक अशोक थोरात, स्थानिक गुन्हे शाखेचे पोलीस निरीक्षक सतीश चवरे यांच्या मार्गदर्शनाखाली स.पो.नि.धीरज बांडे,पो.उपनि.अमोल राठोड तसेच स्थानिक गुन्हे शाखेच्या पथकाने यशस्वीरित्या पार पाडली.
अवैध शस्त्र बाळगणाऱ्यांविरोधात करण्यात आलेल्या या धडक कारवाईमुळे यवतमाळ पोलिसांची सतर्कता आणि कायदा-सुव्यवस्था राखण्याची बांधिलकी पुन्हा अधोरेखित झाली आहे.
