कारवाई दरम्यान १९,०३५ वाहनचालकांकडून १.८५ कोटींचा दंड वसूल
पिंपरी, दि. १८ जून : पिंपरी-चिंचवड पोलीस आयुक्तालयाच्या वाहतूक शाखेने जून महिन्याच्या पहिल्या पंधरवड्यात वाहतूक नियमांचे उल्लंघन करणाऱ्या वाहनचालकांविरुद्ध विशेष मोहीम राबवत १९ हजार ३५ वाहनचालकांवर कारवाई केली. या कारवाईत एकूण १ कोटी ८५ लाख १३ हजार ३०० रुपयांचा दंड वसूल करण्यात आला आहे.
पिंपरी-चिंचवड शहर हे औद्योगिक, आयटी आणि धार्मिकदृष्ट्या महत्त्वाचे केंद्र असून चाकण, भोसरी, तळेगाव ही औद्योगिक क्षेत्रे, हिंजवडी, तळवडे व चिखली येथील आयटी पार्क तसेच देहू-आळंदीसारखी तीर्थक्षेत्रे यामुळे शहरात मोठ्या प्रमाणावर नागरिक आणि वाहनांची वर्दळ असते. याशिवाय आयुक्तालयाच्या हद्दीतून पाच प्रमुख महामार्ग जात असल्याने वाहतुकीवरील ताण सातत्याने वाढत आहे.
वाढत्या वाहनसंख्येमुळे वाहतूक नियमभंग आणि वाहनांशी संबंधित गुन्ह्यांमध्ये वाढ होत असल्याच्या पार्श्वभूमीवर पोलीस आयुक्त विनयकुमार चौबे यांच्या आदेशानुसार, सहपोलीस आयुक्त शशीकांत महावरकर व अपर पोलीस आयुक्त सारंग आवाड यांच्या मार्गदर्शनाखाली १ ते १५ जून २०२६ या कालावधीत विशेष कारवाई करण्यात आली.
या मोहिमेत काळी काच लावलेल्या २,५६२ वाहनांवर, मॉडिफाईड सायलेंसर वापरणाऱ्या १,०१८ वाहनांवर, जड व अवजड वाहनांच्या ४,४४४ चालकांवर, वाहतुकीस अडथळा निर्माण करणाऱ्या व नो-पार्किंग नियमांचे उल्लंघन करणाऱ्या १०,६०७ वाहनचालकांवर तसेच मद्यधुंद अवस्थेत वाहन चालविणाऱ्या ४०४ चालकांवर कारवाई करण्यात आली.
वाहतूक शाखेने नागरिकांना वाहतूक नियमांचे पालन करण्याचे आवाहन केले असून नियमभंग केल्यास दंडात्मक तसेच न्यायालयीन कारवाईला सामोरे जावे लागू शकते, असे स्पष्ट केले आहे. तसेच वाहतूक कोंडी, वाहतूक नियमन आणि इतर वाहतूकविषयक समस्यांच्या निवारणासाठी ‘ट्रॅफिक बडी’ व्हॉट्सॲप चॅटबॉट (८७८८६४९८८५) चा अधिकाधिक वापर करण्याचे आवाहनही करण्यात आले आहे.
