दौंड, प्रतिनिधी : पुणे ग्रामीण पोलिसांच्या स्थानिक गुन्हे शाखा आणि दौंड पोलिसांनी संयुक्त कारवाई करत आंतरजिल्हा दरोडा व जबरी चोरी करणाऱ्या टोळीचा पर्दाफाश केला आहे. या कारवाईत तीन सराईत आरोपींना अटक करण्यात आली असून एका विधीसंघर्षित बालकाला ताब्यात घेण्यात आले आहे. आरोपींकडून सुमारे २५ लाख रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, गेल्या काही महिन्यांपासून दौंड, बारामती आणि जुन्नर परिसरात दरोडे, जबरी चोरी व घरफोडीच्या घटनांमध्ये वाढ झाली होती. या घटनांचा तपास सुरू असताना स्थानिक गुन्हे शाखा आणि दौंड पोलिसांनी सीसीटीव्ही फुटेज, तांत्रिक विश्लेषण तसेच गुप्त माहितीच्या आधारे आरोपींचा माग काढला.
या कारवाईत गणेश मंगेश काळे (वय २२), विशाल हंबर्ध्या काळे (वय २१) आणि किशोर रावण भोसले (वय १९) यांना अटक करण्यात आली. तसेच एका विधीसंघर्षित बालकाला ताब्यात घेण्यात आले आहे.
आरोपींकडून सुमारे १७ तोळे सोन्याचे दागिने, ३२४ ग्रॅम चांदीचे दागिने आणि इतर चोरीचा मुद्देमाल असा एकूण २५ लाख रुपयांचा ऐवज जप्त करण्यात आला आहे. या कारवाईमुळे पुणे ग्रामीण पोलिसांच्या हद्दीतील १५ गंभीर गुन्ह्यांचा उलगडा झाला आहे.
तपासादरम्यान आरोपींचा संबंध अहिल्यानगर आणि बीड जिल्ह्यांशी असल्याचे निष्पन्न झाले आहे. पोलिसांच्या या धडाकेबाज कारवाईमुळे दरोडा आणि घरफोडीच्या घटनांवर आळा बसण्यास मदत होणार असल्याचे बोलले जात आहे.
पुणे ग्रामीण पोलिसांच्या या यशस्वी कारवाईचे नागरिकांकडून स्वागत करण्यात येत असून संबंधित आरोपींकडून आणखी गुन्ह्यांचा उलगडा होण्याची शक्यता पोलिसांनी व्यक्त केली आहे.
