पुणे (चाकण): दक्षिण महाळुंगे एमआयडीसी पोलिसांनी अवैधरीत्या व्यावसायिक गॅस सिलिंडरची वाहतूक करणाऱ्या एका व्यक्तीविरुद्ध कारवाई करत टेम्पोसह एकूण २ लाख ६९ हजार २०० रुपयांचा मुद्देमाल जप्त केला आहे.
याप्रकरणी दक्षिण महाळुंगे एमआयडीसी पोलीस ठाण्यात गुन्हा क्रमांक ५३२/२०२६ दाखल करण्यात आला असून, भारतीय न्याय संहिता (बीएनएस) कलम २८७, २८८ तसेच जीवनावश्यक वस्तू अधिनियम कलम ३ व ७ अंतर्गत गुन्हा नोंदविण्यात आला आहे.
पोलीस शिपाई राजेंद्र परमेश्वर खेडकर यांनी दिलेल्या फिर्यादीवरून हा गुन्हा दाखल करण्यात आला. पोलिसांनी दिलेल्या माहितीनुसार, दि. १६ जून २०२६ रोजी पहाटे १.१५ वाजण्याच्या सुमारास मौजे खराबवाडी (ता. खेड, जि. पुणे) येथील हिंगणे चौक ते सारासिटी मार्गावरील फातिमा चिकन सेंटरसमोर कारवाई करण्यात आली.
या कारवाईत शेखर किशोर भोरे (वय ३०, रा. पवनी पार्क, फ्लॅट क्र. ए-३०२, खराबवाडी, ता. खेड, जि. पुणे, मूळ रा. धोतरी, ता. दक्षिण सोलापूर, जि. सोलापूर) याला ताब्यात घेण्यात आले. आरोपी आपल्या ताब्यातील टेम्पोमधून कोणताही वैध परवाना नसताना सहा व्यावसायिक गॅसने भरलेले सिलिंडर बेकायदेशीररीत्या वाहतूक करत असल्याचे निदर्शनास आले.
पोलिसांनी आरोपीकडून १९ हजार २०० रुपये किमतीचे गॅस सिलिंडर तसेच २ लाख ५० हजार रुपये किमतीचा टेम्पो असा एकूण २ लाख ६९ हजार २०० रुपयांचा मुद्देमाल जप्त केला आहे.
या प्रकरणाचा पुढील तपास दक्षिण महाळुंगे एमआयडीसी पोलीस ठाण्याचे अधिकारी करत आहेत.
