चिखली, दि. १६ जून २०२६ : चिखली पोलीस ठाण्यात ऑनलाइन आर्थिक फसवणुकीचा गुन्हा दाखल करण्यात आला आहे. आरोपींनी विमा पॉलिसी व मोठ्या आर्थिक लाभाचे आमिष दाखवून फिर्यादीची तब्बल ३० लाख २५ हजार ९२६ रुपयांची फसवणूक केल्याची घटना उघडकीस आली आहे.
पोलीसांनी दिलेल्या माहितीनुसार, हा प्रकार ५ डिसेंबर २०२४ ते २९ एप्रिल २०२६ या कालावधीत रुपीनगर, तळवडे येथील कोयना हौसिंग सोसायटी परिसरात घडला. याप्रकरणी चिखली पोलीस ठाण्यात गुन्हा क्रमांक ४०४/२०२६ दाखल करण्यात आला असून भारतीय न्याय संहिता कलम ३१८(४), ३१६(२) तसेच माहिती तंत्रज्ञान अधिनियम कलम ६६(डी) अंतर्गत गुन्हा नोंदविण्यात आला आहे.
फिर्यादी इंद्रजित विजयसिंह भोसले (वय ५१, रा. रुपीनगर, तळवडे) यांनी दिलेल्या तक्रारीनुसार, आरोपी पंकज तिवारी (पूर्ण नाव व इतर तपशील अपूर्ण) याने स्वतःला दिल्ली येथील विमा लोकपाल कार्यालयातून बोलत असल्याचे सांगितले. त्याने फिर्यादीला ६० कोटी रुपयांची टर्म इन्शुरन्स पॉलिसी मिळणार असल्याचे सांगून तसेच पॉलिसी स्वीकारल्यास तात्काळ २ ते ३ लाख रुपये मिळतील आणि संपूर्ण कुटुंबाला विमा संरक्षण मिळेल, असे खोटे आश्वासन दिले.
या आमिषाला बळी पडलेल्या फिर्यादीकडून आरोपीने वेळोवेळी विविध बँक खात्यांमध्ये ऑनलाइन व्यवहाराद्वारे ३०,२५,९२६ रुपये जमा करून घेतले. त्यानंतर आपली फसवणूक झाल्याचे लक्षात आल्याने फिर्यादीने पोलिसांकडे धाव घेतली.या प्रकरणाचा पुढील तपास चिखली पोलीस करीत आहेत.
