भोसरी, दि. १७ जून : एमआयडीसी भोसरी येथील औद्योगिक मालमत्तेच्या खरेदी-विक्री व्यवहारात कोट्यवधी रुपयांची फसवणूक केल्याप्रकरणी दोन जणांविरुद्ध एमआयडीसी भोसरी पोलीस ठाण्यात गुन्हा दाखल करण्यात आला आहे.
याबाबत सौ. छाया मधुकर कोकरे (वय ५०, रा. हनुमाननगर, भगत वस्ती, भोसरी) यांनी फिर्याद दिली आहे. त्यानुसार हरवनसिंग जब्बल (वय ७७) व जसविंदर कौर हरवनसिंग जब्बल (वय ७४, रा. निगडी प्राधिकरण) यांच्याविरुद्ध भारतीय न्याय संहिता कलम ३१८ (४), ३५२, ३५१ (२) व ३ (५) अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, जे-ब्लॉक ३२२, एमआयडीसी भोसरी येथील १४२८ चौरस मीटर क्षेत्रफळाची औद्योगिक मालमत्ता आणि त्यावरील बांधकाम फिर्यादींना विकण्याचा व्यवहार सन २०२२ मध्ये पाच कोटी रुपयांत ठरला होता. त्यासाठी विसार पावतीही करण्यात आली होती. या व्यवहारापोटी फिर्यादींनी आरोपींना वेळोवेळी तब्बल २ कोटी ४५ लाख रुपये दिल्याचा दावा केला आहे.
त्यानंतर संबंधित मालमत्ता दुसऱ्या व्यक्तीस विक्रीसाठी दैनिकात जाहीर नोटीस प्रसिद्ध झाल्याचे फिर्यादींच्या निदर्शनास आले. त्यानंतर दोन्ही पक्षांमध्ये पुन्हा सहा कोटी रुपयांत व्यवहार निश्चित झाला आणि सप्टेंबर २०२४ मध्ये खरेदी दस्तही करण्यात आला. या व्यवहारासाठी फिर्यादींनी एकूण २ कोटी ९५ लाख ५ हजार रुपये अदा केल्याचे तक्रारीत नमूद आहे.
मात्र, आरोपींनी दस्त अस्तित्वात येऊ नये यासाठी फिर्यादी, त्यांचे वकील आणि निबंधक कार्यालयातील कर्मचाऱ्यांविरोधात खोटी तक्रार केल्याचा आरोप आहे. तसेच उर्वरित रक्कम जमा करण्यासाठी फिर्यादींनी डिमांड ड्राफ्टद्वारे प्रयत्न केला असता आरोपींनी बँक खाते तात्पुरते बंद ठेवल्याने रक्कम स्वीकारली गेली नसल्याचेही फिर्यादींनी म्हटले आहे.
याशिवाय मालमत्तेचे खरेदीखत पूर्ण करण्याबाबत वारंवार विचारणा केल्यानंतर आरोपींनी टाळाटाळ करत दमदाटी व शिवीगाळ केल्याचाही आरोप करण्यात आला आहे. या प्रकरणात अद्याप कोणालाही अटक करण्यात आलेली नसून एमआयडीसी भोसरी पोलीस पुढील तपास करीत आहेत.
