पिंपरी-चिंचवड, दि. १२ जून २०२६ : मोशी परिसरातील इंडियन ऑईल काजळे पेट्रोल पंपाजवळ झालेल्या भीषण अपघातात एका ३० वर्षीय महिलेचा मृत्यू झाला असून दुचाकीस्वार गंभीर जखमी झाला आहे. या प्रकरणी एमआयडीसी भोसरी पोलिस ठाण्यात कंटेनर चालकाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी पांडुरंग एकनाथ कुचेकर (वय ३५, रा. खंडेवस्ती, भोसरी) हे त्यांच्या अॅक्टिव्हा दुचाकी (एमएच १४ एफबी ९११२) वरून बहिण सविता दयानंद कांबळे (वय ३०) यांना मोशी येथील इंडियन ऑईल काजळे पेट्रोल पंपाजवळून आदर्शनगर येथील घरी घेऊन जात होते. त्यावेळी कंटेनर क्रमांक NL 01 AD 2845 वरील चालक सुंदर पंढरीनाथ गवळी (वय २६, रा. दिधी, पुणे, मूळ रा. धारूर, जि. बीड) याने वाहन भरधाव वेगाने व निष्काळजीपणे चालवत दुचाकीला धडक दिली.
या अपघातात दुचाकीस्वार गंभीर जखमी झाले असून त्यांच्या उजव्या हाताला गंभीर दुखापत होऊन तो निकामी झाल्याचे फिर्यादीत नमूद करण्यात आले आहे. तसेच मागे बसलेल्या सविता कांबळे यांचा गंभीर जखमी होऊन मृत्यू झाला.
या प्रकरणी एमआयडीसी भोसरी पोलिस ठाण्यात गुन्हा क्रमांक २९८/२०२६ अन्वये भारतीय न्याय संहिता कलम १०६(१), २८१, १२५(ब) तसेच मोटार वाहन कायदा कलम १८४, ११९/१७७ अंतर्गत गुन्हा दाखल करण्यात आला आहे. आरोपी चालकास अद्याप अटक करण्यात आलेली नसून पुढील तपास पोलीस उपनिरीक्षक पानसरे करीत आहेत.
