आरटीई प्रवेश प्रक्रियेतील वादानंतर सहप्रकल्प अधिकारी विलास पाटील यांची उचलबांगडी; शिक्षण विभागात खळबळ
पिंपरी : आरटीई प्रवेश प्रक्रियेच्या कागदपत्र पडताळणी केंद्राशी संबंधित वादानंतर पिंपरी-चिंचवड महापालिकेच्या शिक्षण विभागाने सहप्रकल्प अधिकारी विलास पाटील यांचा पदभार तात्काळ रद्द करत त्यांची बदली केली आहे. या कारवाईमुळे शिक्षण विभागात मोठी खळबळ उडाली असून प्रशासकीय वर्तुळात विविध चर्चांना उधाण आले आहे.
उपलब्ध माहितीनुसार, आरटीई प्रवेश प्रक्रियेच्या कागदपत्र पडताळणी केंद्रावर सचिव म्हणून कार्यरत असताना काही अनियमितता झाल्याचे आरोप समोर आले होते. या प्रकरणात एका बाह्य व्यक्तीवर लाचलुचपत प्रतिबंधक विभागाने कारवाई केल्याची घटना घडल्यानंतर प्रवेश प्रक्रियेच्या कामकाजावर प्रश्नचिन्ह निर्माण झाले होते. यासंदर्भातील वृत्ते विविध माध्यमांमधूनही प्रसिद्ध झाली होती.
याच पार्श्वभूमीवर शिक्षण विभागाने विलास पाटील यांच्या कामकाजाबाबत गंभीर दखल घेत त्यांचा सहप्रकल्प अधिकारी पदाचा कार्यभार काढून घेतला आहे. त्यांची बदली शेवंताबाई खंडूजी जगताप वैदूवस्ती मुला-मुलींची शाळा क्रमांक ५८ येथे करण्यात आली असून तात्काळ रुजू होण्याचे आदेश देण्यात आले आहेत. संबंधित मुख्याध्यापकांना त्यांचा रुजू अहवाल सादर करण्याचे निर्देशही देण्यात आले आहेत.
दरम्यान, पाटील यांच्या कार्यपद्धतीबाबत यापूर्वीही विविध तक्रारी शिक्षण विभागाकडे प्राप्त झाल्याचे सांगितले जात आहे. त्यामुळे महापालिकेच्या प्रतिमेला धक्का बसल्याचा मुद्दाही प्रशासनाने गांभीर्याने घेतल्याची चर्चा आहे. तथापि, संबंधित आरोपांची अधिकृत चौकशी अद्याप सुरू असल्याचे प्रशासनाकडून स्पष्ट करण्यात आले आहे.
शिक्षण विभागातील या कारवाईमुळे अनेक प्रश्न उपस्थित झाले असून संबंधित अधिकाऱ्याविरोधातील तक्रारींवर दीर्घकाळ कारवाई का झाली नाही, याबाबतही चर्चा सुरू आहे. पत्रकारांनी या प्रकरणाचा सातत्याने पाठपुरावा केल्यानंतर प्रशासनावर दबाव वाढल्याचे बोलले जात आहे.
सध्या या संपूर्ण प्रकरणाकडे शहराचे लक्ष लागले असून भविष्यात संबंधित अधिकाऱ्याविरोधात खातेनिहाय चौकशी सुरू होण्याची शक्यता वर्तवली जात आहे. चौकशीत गंभीर दोष आढळल्यास नियमानुसार पुढील शिस्तभंगाची कारवाई होऊ शकते. मात्र, चौकशी पूर्ण होईपर्यंत कोणत्याही निष्कर्षापर्यंत पोहोचणे उचित ठरणार नसल्याचे प्रशासनातील सूत्रांचे म्हणणे आहे.
