चाकण उत्तर पोलिसांची कारवाई
पुणे,चाकण : घरगुती गॅस सिलिंडरमध्ये बेकायदेशीररीत्या गॅस भरून चढ्या भावाने विक्री करण्याचा प्रकार उघडकीस आणत चाकण उत्तर पोलिसांनी एका युवकाविरुद्ध गुन्हा दाखल केला आहे.
याप्रकरणी चाकण उत्तर पोलीस ठाण्यात गुन्हा रजिस्टर क्रमांक ५०५/२०२६ अन्वये बीएनएस कलम ३०३(२), ३१८(३), १२५, २८७ तसेच जीवनावश्यक वस्तू अधिनियम १९५५ आणि पुरवठा व वितरण नियमन आदेश २००० मधील संबंधित कलमानुसार गुन्हा दाखल करण्यात आला आहे.
पोलिसांनी दिलेल्या माहितीनुसार, ९ जून रोजी सायंकाळी सुमारे ६.४५ वाजण्याच्या सुमारास चाकण गावातील चक्रेश्वर मंदिर ते मेदणकरवाडी फाटा मार्गावरील द्वारकामाई सोसायटीसमोर ही कारवाई करण्यात आली. आरोपी निखील अनिल झोडाचे (वय २२, रा. कुरुळी, ता. खेड, जि. पुणे) हा व्यावसायिक गॅस टाकीतून लाल रंगाच्या लहान घरगुती सिलिंडरमध्ये काळ्या रंगाच्या नोजल पाइपच्या साहाय्याने गॅस भरत असल्याचे आढळून आले.
यावेळी कोणतीही सुरक्षाविषयक उपकरणे वापरण्यात आलेली नव्हती. त्यामुळे स्वतःचे तसेच इतर नागरिकांच्या जीवितास धोका निर्माण होण्याची शक्यता असल्याचे पोलिसांनी नमूद केले आहे. आर्थिक फायद्यासाठी घरगुती गॅसची अवैधरित्या विक्री करण्याच्या उद्देशाने हा प्रकार सुरू असल्याचा आरोप आहे.
या प्रकरणी पोलीस हवालदार भैरोबा मनोहर यादव यांनी फिर्याद दिली असून पुढील तपास चाकण उत्तर पोलीस ठाण्याचे अधिकारी करीत आहेत. :::
