पिंपरी-चिंचवड,वाकड : महाराष्ट्रात बंदी असलेल्या गुटखा, पानमसाला व सुगंधित सुपारीचा साठा बाळगून विक्री केल्याप्रकरणी वाकड पोलिसांनी गुन्हा दाखल केला असून एका आरोपीला अटक करण्यात आली आहे.
वाकड पोलीस ठाण्यात गुन्हा रजिस्टर क्रमांक ३००/२०२६ अन्वये भारतीय न्याय संहिता २०२३ चे कलम १२३, २२३, २७४, २७५ तसेच अन्न सुरक्षा व मानके अधिनियम २००६ मधील विविध कलमान्वये गुन्हा नोंद करण्यात आला आहे.
अन्न सुरक्षा अधिकारी आफनान अब्दुल कादीर शेख (वय ३०, रा. पुणे) यांनी दिलेल्या फिर्यादीवरून हा गुन्हा दाखल करण्यात आला. ८ जून २०२६ रोजी दुपारी सुमारे १२.०१ वाजण्याच्या सुमारास थेरगाव येथील आनंदवन सोसायटी, लेन क्रमांक ६ मधील राजेंद्र टेकाळे यांच्या तळमजल्यावरील खोलीत छापा टाकण्यात आला.
या कारवाईत बंदी असलेल्या गुटखा, पानमसाला, सुगंधित व स्वादिष्ट सुपारीसह तंबाखूजन्य पदार्थांचा एकूण ८ लाख ३७ हजार १०९ रुपयांचा साठा जप्त करण्यात आला. या पदार्थांच्या सेवनामुळे कर्करोगासह गंभीर आजार होण्याची शक्यता असल्याने राज्य सरकारने त्यांच्या उत्पादन, साठवणूक, वितरण व विक्रीवर बंदी घातलेली आहे.
या प्रकरणात किशोर लाहू लोंढे (उर्फ कमार लोंढे, वय ३२), अमोल लाहू लोंढे (वय ३६), घरमालक राजेंद्र किसन टेकाळे तसेच खतम खान व बाबर खान यांच्याविरुद्ध गुन्हा दाखल करण्यात आला आहे. यापैकी किशोर लोंढे याला अटक करण्यात आली असून इतर आरोपींचा शोध सुरू आहे.या प्रकरणाचा पुढील तपास सहाय्यक पोलीस निरीक्षक देशमुख करीत आहेत.
