पिंपरी-चिंचवड : शहरातील संघटित गुन्हेगारीला आळा घालण्यासाठी पिंपरी-चिंचवड पोलिसांनी पुन्हा एकदा कठोर पाऊल उचलत पाच कुख्यात गुन्हेगारी टोळ्यांमधील तब्बल ४५ आरोपींवर महाराष्ट्र संघटित गुन्हेगारी नियंत्रण अधिनियम (मोका) अंतर्गत कारवाई केली आहे. खून, खुनाचा प्रयत्न, खंडणी, दरोडा, बेकायदेशीर शस्त्र बाळगणे आणि दहशत निर्माण करण्यासारख्या गंभीर गुन्ह्यांमध्ये सहभागी असलेल्या आरोपींना या कारवाईचा फटका बसला आहे.
पिंपरी-चिंचवड पोलिसांनी सन २०२६ मध्ये आतापर्यंत २७ संघटित गुन्हेगारी टोळ्यांमधील १५० आरोपींवर मोका अंतर्गत कारवाई केली असून, मे महिन्यातील ही कारवाई विशेष महत्त्वाची मानली जात आहे.
देहूरोड पोलीस ठाण्याच्या हद्दीतील आफताब समीर शेख टोळीवर १२ गंभीर गुन्ह्यांची नोंद असून या टोळीतील सात आरोपींवर मोका लागू करण्यात आला आहे. त्याचप्रमाणे साबीर समीर शेख टोळीविरुद्ध १९ गंभीर गुन्हे दाखल असून या टोळीतील तब्बल २१ आरोपींवर मोका कारवाई करण्यात आली आहे.
काळेवाडी पोलीस ठाण्याच्या हद्दीतील विकी शंभुलिंग सुतार टोळीवर आठ गंभीर गुन्हे दाखल असून चार आरोपींना मोका कायद्याखाली आणण्यात आले आहे. उत्तर म्हाळुंगे पोलीस ठाण्याच्या हद्दीतील सागर बाळू जावळे टोळीवर सात गंभीर गुन्ह्यांची नोंद असून सात जणांवर कारवाई करण्यात आली आहे. तर चिखली पोलीस ठाण्याच्या हद्दीतील अंबादास उर्फ सोन्या राठोड टोळीतील सहा आरोपींवर मोका लागू करण्यात आला आहे. या टोळीतील काही आरोपी अद्याप फरार असल्याची माहिती पोलिसांनी दिली.
या सर्व टोळ्यांनी पिंपरी-चिंचवड, पुणे आणि अहिल्यानगर परिसरात वर्चस्व प्रस्थापित करण्यासाठी हिंसाचाराचा मार्ग स्वीकारला होता. अवैध मार्गाने आर्थिक लाभ मिळवणे, खंडणी उकळणे आणि नागरिकांमध्ये भीतीचे वातावरण निर्माण करणे हा त्यांचा मुख्य उद्देश असल्याचे तपासात निष्पन्न झाले आहे.
गुन्ह्यांचे गांभीर्य लक्षात घेऊन संबंधित कागदपत्रांची छाननी केल्यानंतर अपर पोलीस आयुक्त (गुन्हे) श्री. सारंग आवाड यांनी १२ गुन्ह्यांमध्ये, तर अपर पोलीस आयुक्त (प्रादेशिक विभाग) श्री. बसवराज तेली यांनी १५ गुन्ह्यांमध्ये मोका कायद्याचा समावेश करण्याचे आदेश दिले.
पोलीस आयुक्त श्री. विनय कुमार चौबे, सह पोलीस आयुक्त डॉ. शशिकांत महावरकर तसेच विविध परिमंडळांचे पोलीस उपायुक्त यांच्या मार्गदर्शनाखाली ही कारवाई करण्यात आली. देहूरोड, काळेवाडी, उत्तर म्हाळुंगे व चिखली पोलीस ठाण्यांचे अधिकारी, गुन्हे शाखेचे पथक आणि मालमत्ता विरोधी पथकाने या मोहिमेत सक्रिय सहभाग घेतला.
