वैजापूर (प्रतिनिधी) विजयकुमार मोकळे : महाराष्ट्र शासनाने अनुसूचित जातींमधील उपवर्गीकरणाचा अभ्यास करण्यासाठी अनंत बदर समिती स्थापन केल्यानंतर राज्यभरात विविध सामाजिक संघटनांकडून विरोधाची लाट उसळली आहे. याच पार्श्वभूमीवर छत्रपती संभाजीनगर जिल्ह्यातील वैजापूर येथील जेतवन बुद्ध विहारात शनिवारी (दि. ६ जून) अनुसूचित जाती उपवर्गीकरण जनजागृती परिषदेचे आयोजन करण्यात आले. या परिषदेत उपवर्गीकरणाविरोधात ५८ जातींनी एकजूट दर्शवत व्यापक जनआंदोलन उभारण्याचा निर्धार व्यक्त केला.
परिषदेची सुरुवात तथागत भगवान बुद्ध यांच्या प्रतिमेचे पूजन करून करण्यात आली. कार्यक्रमाचे सूत्रसंचालन व्याख्याते प्रा. आबासाहेब कसबे यांनी केले, तर शिक्षक संघटनेचे जिल्हा नेतृत्व विलास त्रिभुवन आणि बहुजन समाज पक्षाचे नेते बाबासाहेब पगारे यांनी प्रस्तावना मांडली.
या परिषदेत आंबेडकरी चळवळीतील ज्येष्ठ नेते दिनकर दादा ओंकार, प्रा. डॉ. एच. एन. सोनकांबळे, ज्येष्ठ विचारवंत प्रा. दिलीप महालिंगे यांनी प्रमुख मार्गदर्शन केले. प्रा. डॉ. सोनकांबळे यांनी अनुसूचित जाती उपवर्गीकरणाची पार्श्वभूमी, त्याचे संभाव्य परिणाम आणि समाजाची भूमिका यावर सविस्तर विवेचन केले. तर दिनकर दादा ओंकार आणि प्रा. महालिंगे यांनी उपवर्गीकरणाच्या विरोधातील लढ्याची दिशा, संघटनात्मक बांधणी आणि पुढील आंदोलनाची रणनीती यावर भाष्य केले.
कार्यक्रमादरम्यान सुप्रसिद्ध कवी, गायक व व्याख्याते विजय मोकळे करंजगावकर यांनी ‘छोटा भाऊ–मोठा भाऊ’ ही उपवर्गीकरण विषयावरील रचना सादर करून उपस्थितांचे लक्ष वेधून घेतले.
परिषदेत उपवर्गीकरणासंदर्भातील वास्तव परिस्थिती, आगामी आंदोलनांची दिशा, संघटनात्मक बळकटीकरण तसेच राज्यव्यापी चळवळीची उभारणी या विषयांवर सखोल चर्चा करण्यात आली. यावेळी पुढील आंदोलनासाठी विविध ठरावही मंजूर करण्यात आले.
कार्यक्रमाच्या अध्यक्षस्थानी ज्येष्ठ नेते राजेंद्र बागुल होते. त्यांनी अध्यक्षीय समारोपात सर्व उपस्थितांचे आभार मानून समाजाने एकसंघ राहून हक्कांसाठी संघर्ष करण्याचे आवाहन केले.
या परिषदेला पत्रकार व मार्केट कमिटी संचालक प्रशांत त्रिभुवन, कलाकार संघटनेचे अध्यक्ष प्रमोद पठारे, काशिनाथ बागुल, पंचशीला धनेश्वर, नामदेव त्रिभुवन, मनीष गणवीर, प्रल्हाद सातुरे, वाल्मीक त्रिभुवन, जानवी मोकळे, राजनंदिनी मोकळे, शिक्षण अधिकारी मनीष दिवेकर, साहेबराव पडवळ यांच्यासह मोठ्या संख्येने उपासक-उपासिका आणि समाजबांधव उपस्थित होते.
