पिंपरी, दि. ४ जून २०२६ : पिंपरी-चिंचवड गुन्हे शाखेच्या अंमली पदार्थ विरोधी पथकाने निगडी येथील अजंठानगर परिसरात कारवाई करत गांजा विक्रीप्रकरणी दोघांविरुद्ध गुन्हा दाखल केला असून एका आरोपीला अटक करण्यात आली आहे.
पोलीसांनी दिलेल्या माहितीनुसार, दि. ३ जून २०२६ रोजी दुपारी १२.४५ वाजण्याच्या सुमारास अजंठानगर, निगडी येथील अंबिका पान शॉपजवळ पत्राशेडखालील मोकळ्या जागेत ही कारवाई करण्यात आली. याप्रकरणी निगडी पोलीस ठाण्यात गुन्हा क्रमांक ३३८/२०२६ अन्वये एनडीपीएस कायदा कलम ८(क), २०(ब)(ii)(अ) व २९ अंतर्गत गुन्हा दाखल करण्यात आला आहे.
या प्रकरणातील अटक आरोपी पियुष प्रकल्प जाधव (वय १९, रा. बालाजीनगर झोपडपट्टी, भोसरी) याच्याकडून ३२ ग्रॅम वजनाचा सुमारे १ हजार ६०० रुपये किमतीचा गांजा जप्त करण्यात आला. आरोपी हा सदर अंमली पदार्थ बेकायदेशीररीत्या विक्रीसाठी बाळगत असल्याचे तपासात निष्पन्न झाले.
पोलीस चौकशीत पियुष जाधव याने हा गांजा विमल संजय निंबाळकर (रा. पत्राशेड, अजंठानगर, निगडी) याच्याकडून विक्रीसाठी आणल्याची माहिती दिली. त्यानुसार दुसऱ्या आरोपीचाही गुन्ह्यात समावेश करण्यात आला आहे.
या प्रकरणी पोलीस शिपाई प्रतीक संभाजी कवडे (अंमली पदार्थ विरोधी पथक, गुन्हे शाखा) यांनी फिर्याद दिली असून पुढील तपास सहाय्यक पोलीस निरीक्षक अजगेकर यांच्या मार्गदर्शनाखाली सुरू आहे.
