पिंपरी, दि. ३० मे २०२६: पिंपरी पोलीस ठाण्याच्या हद्दीतील भाटनगर परिसरात हातभट्टीची दारू तयार करण्यासाठी साठवून ठेवलेला कच्चा माल आणि साहित्य जप्त करण्यात आले असून एका महिलेविरुद्ध महाराष्ट्र प्रोहिबिशन अॅक्ट अंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, दि. ३० मे २०२६ रोजी दुपारी सुमारे ३.१५ वाजण्याच्या सुमारास भाटनगर येथील बिल्डिंग क्रमांक ६ मधील चौथ्या मजल्यावरील उजव्या बाजूच्या क्रमांक १ च्या खोलीवर छापा टाकण्यात आला. या कारवाईदरम्यान संबंधित ठिकाणी हातभट्टीची दारू तयार करण्यासाठी लागणारे रसायनयुक्त कच्चा माल, गॅस सिलेंडर, बर्नर, पाईप आणि रेग्युलेटर असा एकूण सुमारे ५,२०० रुपयांचा मुद्देमाल आढळून आला.
या प्रकरणी वर्षा सुरेश भाट (वय अंदाजे ४० वर्षे, रा. भाटनगर, पिंपरी) यांच्याविरुद्ध पिंपरी पोलीस ठाण्यात गुन्हा क्रमांक ३०९/२०२६ दाखल करण्यात आला आहे. त्यांच्यावर महाराष्ट्र प्रोहिबिशन अॅक्ट कलम ६५ (फ) अन्वये कारवाई करण्यात आली आहे.
या संदर्भात पोलीस शिपाई दत्ताजी तानाजी कवठेकर यांनी फिर्याद दिली असून पुढील तपास पोलीस उपनिरीक्षक दलालवाड यांच्या मार्गदर्शनाखाली सुरू आहे.
