अवैध दारू अड्ड्यांवर २४ तासांत कारवाईची मागणी; घटनास्थळी भेट देत कुटुंबीयांचे सांत्वन
पिंपरी-चिंचवड | २९ मे २०२६…फुगेवाडी परिसरात गुरुवारी (दि. २८ मे) एकाच दिवशी आठ नागरिकांचा झालेला संशयास्पद मृत्यू शहरासाठी अत्यंत धक्कादायक आणि चिंताजनक असल्याचे सांगत भाजपचे आमदार अमित गोरखे यांनी या संपूर्ण प्रकरणाची उच्चस्तरीय व निष्पक्ष चौकशी करण्याची मागणी केली आहे. तसेच मृतांच्या कुटुंबियांना शासनाकडून प्रत्येकी पाच लाख रुपयांची आर्थिक मदत जाहीर करावी, अशीही मागणी त्यांनी केली.
घटनेची माहिती मिळताच आमदार अमित गोरखे यांनी फुगेवाडी परिसराला भेट देऊन परिस्थितीची पाहणी केली. त्यांनी मृतांच्या कुटुंबीयांची भेट घेत सांत्वन केले तसेच स्थानिक नागरिकांशी संवाद साधून घटनेबाबत सविस्तर माहिती घेतली.
“एकाच परिसरातील आठ नागरिकांचा एकाच दिवशी मृत्यू होणे ही अत्यंत गंभीर बाब आहे. या घटनेमागील सत्य समोर येणे आवश्यक असून नागरिकांच्या मनातील संशय दूर करण्याची जबाबदारी प्रशासनाची आहे,” असे आमदार गोरखे यांनी यावेळी सांगितले.
मुख्यमंत्री आणि पोलीस आयुक्तांना पत्र
या घटनेची गंभीर दखल घेत आमदार गोरखे यांनी मुख्यमंत्री तसेच पिंपरी-चिंचवड पोलीस आयुक्तांना अधिकृत पत्र पाठवून तातडीने कठोर कारवाई करण्याची मागणी केली आहे.
पत्रात त्यांनी पुढील प्रमुख मागण्या केल्या आहेत :
💮मृतांच्या कुटुंबियांना शासनाकडून प्रत्येकी ५ लाख रुपयांची मदत द्यावी.
💮दापोडी, फुगेवाडीसह शहरातील झोपडपट्टी आणि कामगार वस्त्यांमधील अवैध हातभट्टी व बेकायदेशीर दारू अड्डे पुढील २४ तासांत उद्ध्वस्त करावेत.
💮सर्व मृतांचे शवविच्छेदन व फॉरेन्सिक अहवाल तातडीने प्राप्त करून मृत्यूचे नेमके कारण जाहीर करावे.
💮विषारी दारू अथवा अन्य बेकायदेशीर कारणांमुळे मृत्यू झाल्याचे स्पष्ट झाल्यास संबंधित सूत्रधारांवर कठोर कलमांखाली गुन्हे दाखल करावेत.
💮संबंधित भागात रात्रीची पोलीस गस्त वाढवून गुप्तवार्ता यंत्रणा अधिक सतर्क करावी.
“तपासात हस्तक्षेप खपवून घेतला जाणार नाही”
या प्रकरणात कोणताही राजकीय हस्तक्षेप अथवा तपास भरकटवण्याचा प्रयत्न सहन केला जाणार नाही, असा इशाराही आमदार अमित गोरखे यांनी दिला. “पीडित कुटुंबियांना न्याय मिळवून देण्यासाठी आम्ही त्यांच्या पाठीशी खंबीरपणे उभे आहोत,” असे त्यांनी स्पष्ट केले.
दोघे जण मृत्यूशी झुंज देत
या घटनेत आठ जणांचा मृत्यू झाला असताना सुभाष डिगीकर आणि अक्षय अवसरमल हे दोघे जण सध्या रुग्णालयात उपचार घेत असून त्यांची प्रकृती चिंताजनक असल्याची माहिती समोर आली आहे. आमदार गोरखे यांनी त्यांच्या प्रकृतीचीही विचारपूस केली.
“पिंपरी-चिंचवड शहराला अवैध धंद्यांचा विळखा बसू दिला जाणार नाही. या प्रकरणातील दोषींवर कठोर कारवाई व्हावी यासाठी गृहविभागाकडे सातत्याने पाठपुरावा करणार,” अशी ग्वाही आमदार अमित गोरखे यांनी दिली.
