पिंपरी, दि. २७ मे २०२६ : स्थानिक स्वराज्य संस्थांमधील मालमत्ता कर व्यवस्थापन अधिक प्रभावी, पारदर्शक आणि महसूलवृद्धीस चालना देण्यासाठी नवी मुंबई महापालिकेच्या शिष्टमंडळाने आज पिंपरी-चिंचवड महापालिकेच्या कर आकारणी व कर संकलन विभागाला अभ्यासभेट दिली. यावेळी उपायुक्त सचिन पवार यांनी पिंपरी-चिंचवड महापालिकेच्या मालमत्ता कर प्रणालीची सविस्तर माहिती शिष्टमंडळाला दिली.
उपायुक्त सचिन पवार यांनी मालमत्ता कर व्यवस्थापनातील विविध प्रक्रिया, महसूलवाढीसाठी राबविण्यात येणाऱ्या उपाययोजना तसेच तंत्रज्ञानाधारित प्रणालींबाबत माहिती देताना सांगितले की, महापालिका मालमत्ता कर प्रणाली अधिक पारदर्शक, डिजिटल आणि नागरिककेंद्रित करण्यासाठी सातत्याने प्रयत्नशील आहे. जीआयएस सर्वेक्षण, डिजिटल करप्रणाली आणि कार्यक्षम महसूल व्यवस्थापनाच्या माध्यमातून नागरिकांना अधिक सुलभ व दर्जेदार सेवा देण्यावर भर दिला जात आहे.
ते पुढे म्हणाले की, विविध महापालिकांमधील अशा अभ्यासभेटींमुळे प्रशासनातील सर्वोत्तम पद्धतींची देवाणघेवाण होते. त्यामुळे महसूल व्यवस्थापन अधिक सक्षम होण्यास मदत होते आणि नागरिकांना विश्वासार्ह व जलद सेवा उपलब्ध करून देणे शक्य होते. स्थानिक स्वराज्य संस्थांनी एकमेकांच्या यशस्वी उपक्रमांचा अभ्यास करून त्यांचा अवलंब करणे ही विकासाभिमुख प्रक्रिया असल्याचेही त्यांनी नमूद केले.
यावेळी नवी मुंबई महापालिकेच्या शिष्टमंडळाने मालमत्ता कर आकारणीची कार्यपद्धती, सर्वेक्षण व पुनर्मूल्यांकन प्रक्रिया, लेटिंग रेट निर्धारण, महसूलवाढीसाठी राबविण्यात येणारे उपक्रम, जनजागृती मोहिमा तसेच डिजिटल प्रणालींच्या वापराबाबत विशेष माहिती जाणून घेतली.
तसेच जीआयएस आधारित सर्वेक्षण, थकबाकी वसुलीसाठी राबविण्यात येणाऱ्या उपाययोजना आणि नागरिकाभिमुख सेवा अधिक सक्षम करण्यासाठी पिंपरी-चिंचवड महापालिकेकडून राबविण्यात येणाऱ्या नाविन्यपूर्ण उपक्रमांची माहितीही शिष्टमंडळाला देण्यात आली.
या अभ्यासभेटीमुळे दोन्ही महापालिकांमध्ये प्रशासनातील सर्वोत्तम पद्धतींची देवाणघेवाण होऊन अधिक कार्यक्षम, तंत्रज्ञानाधारित आणि नागरिकाभिमुख कर व्यवस्थापनाला चालना मिळणार असल्याचा विश्वास यावेळी व्यक्त करण्यात आला.
