पुणे……कुराश या खेळाच्या बनावट क्रीडा प्रमाणपत्रांच्या आधारे पोलिस सेवेत नियुक्ती मिळवण्याचा प्रयत्न करणाऱ्या उमेदवारांविरोधात चौकशी व कायदेशीर कारवाई करण्याचे आदेश महाराष्ट्र राज्याच्या क्रीडा व युवक सेवा संचालनालयाने दिले आहेत.
मानवी हक्क संरक्षण आणि जागृती संस्थेने दि. १९ मे २०२६ रोजी क्रीडा विभागाकडे यासंदर्भात लेखी तक्रार दाखल केली होती. या तक्रारीची दखल घेत क्रीडा आयुक्त दीपक सिंगला यांच्या कार्यालयाने प्रकरणाची गंभीर नोंद घेतली आहे.
क्रीडा विभागाने जारी केलेल्या आदेशानुसार, संबंधित उमेदवार हे सोलापूर जिल्ह्यातील असल्याचे निदर्शनास आले असून त्यांच्या क्रीडा प्रमाणपत्रांची पडताळणी पुणे विभागीय उपसंचालक, क्रीडा व युवक सेवा कार्यालयामार्फत करण्यात येणार आहे.
शासन निर्णय दि. ३० जून २०२२ मधील तरतुदीनुसार, विभागीय उपसंचालक, क्रीडा व युवक सेवा पुणे विभाग यांच्या अध्यक्षतेखाली समिती गठीत करून संबंधित उमेदवारांच्या प्रमाणपत्रांची फेरपडताळणी केली जाणार आहे. आवश्यकतेनुसार उमेदवारांची क्रीडा कौशल्य चाचणीही घेण्यात येणार असून त्याचा अहवाल तात्काळ संचालनालयास सादर करण्याचे निर्देश क्रीडा आयुक्तांनी दिले आहेत.
यासंदर्भात मानवी हक्क संरक्षण आणि जागृती संस्थेचे शहराध्यक्ष आण्णा जोगदंड यांनी सांगितले की, “बनावट क्रीडा प्रमाणपत्रांच्या आधारे शासकीय सेवेत प्रवेश मिळवण्याचे प्रकार हे केवळ शासनाची फसवणूक नसून प्रामाणिक व मेहनती खेळाडूंवर अन्याय करणारे आहेत. अशा गैरप्रकारांमुळे पात्र उमेदवारांचे हक्क हिरावले जातात. या प्रकरणाची निष्पक्ष व सखोल चौकशी करून दोषींवर कठोर कारवाई करणे आवश्यक आहे. भविष्यात अशा प्रकारांना आळा बसण्यासाठी प्रमाणपत्र पडताळणी प्रक्रिया अधिक पारदर्शक आणि काटेकोर करण्यात यावी.”
संस्थेचे अध्यक्ष विकास कुचेकर म्हणाले की, “क्रीडा आरक्षणाचा गैरवापर थांबवण्यासाठी शासनाने राज्यभर विशेष पडताळणी मोहीम राबवावी. अन्यथा आमच्या संस्थेच्या वतीने राज्यभर आंदोलन छेडले जाईल.”
सदर प्रकरणामुळे पोलिस भरती प्रक्रियेतील क्रीडा आरक्षण आणि प्रमाणपत्र पडताळणी यंत्रणेवर पुन्हा एकदा प्रश्नचिन्ह निर्माण झाले असून चौकशी अहवालानंतर पुढील कारवाईकडे आमच्या संस्थेचे बारकाईने लक्ष आहे. त्यानंतरच संस्थेची पुढील दिशा ठरवली जाईल, असेही कुचेकर यांनी स्पष्ट केले.
दि. १९ मे २०२६ रोजी सादर करण्यात आलेल्या निवेदनावर संस्थाध्यक्ष विकास कुचेकर, शहराध्यक्ष आण्णा जोगदंड, उपाध्यक्ष काळूराम लांडगे, डॉ. यामिनी अडबे, सचिव गजानन धाराशिवकर आणि कार्याध्यक्ष मुरलीधर दळवी यांच्या सह्या होत्या.
