पिंपरी-चिंचवड : अंमली पदार्थविरोधी पथकाने दक्षिण म्हाळुंगे पोलीस ठाण्याच्या हद्दीत कारवाई करत गांजासह एका आरोपीला अटक केली आहे. या प्रकरणी दक्षिण म्हाळुंगे पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, दि. २२ मे २०२६ रोजी दुपारी ३.०७ वाजण्याच्या सुमारास स्पायसर चौक ते वोक्सवॅगन रोडलगत जगदंब हॉटेलसमोर, डोंगरवस्ती, निघोजे (ता. खेड, जि. पुणे) येथे ही कारवाई करण्यात आली. रात्री १०.४४ वाजता दक्षिण म्हाळुंगे पोलीस ठाण्यात गुन्हा नोंदविण्यात आला.या प्रकरणी पोलीस शिपाई रणधिर रमेश माने (अंमली पदार्थविरोधी पथक, गुन्हे शाखा, पिंपरी-चिंचवड) यांनी फिर्याद दिली आहे.पोलीसांनी संभाजी विठ्ठल मात्रे (वय ३८, रा. डोंगरवस्ती, ता. खेड, जि. पुणे; मूळ रा. चिंचवण, ता. वडवणी, जि. बीड) याला अटक केली आहे.
आरोपीच्या ताब्यातून सुमारे ६९ हजार ८०० रुपये किंमतीचा मुद्देमाल जप्त करण्यात आला असून त्यामध्ये १ किलो १९६ ग्रॅम गांजा तसेच एक मोबाईल हँडसेटचा समावेश आहे. आरोपी हा गांजा बेकायदेशीररीत्या विक्रीसाठी बाळगत असल्याचे तपासात समोर आले आहे.या प्रकरणाचा पुढील तपास पोलीस उपनिरीक्षक पिंजारी करीत आहेत.
