पिंपरी चिंचवड: सोशल मीडियावर तात्काळ कर्ज (इन्स्टंट लोन) देण्याच्या आमिषाने नागरिकांची आर्थिक फसवणूक करणाऱ्या बनावट लोन ॲप्सचे प्रकार वाढत असल्याने सायबर यंत्रणांनी नागरिकांना सतर्कतेचा इशारा दिला आहे. अशा ॲप्सद्वारे नागरिकांच्या मोबाईलमधील वैयक्तिक माहिती मिळवून त्यांना धमकावले जात असल्याच्या अनेक तक्रारी समोर आल्या आहेत.
सायबर गुन्हेगार सोशल मीडियावर “तात्काळ कर्ज उपलब्ध” अशा जाहिराती प्रसारित करतात. संबंधित लिंकवर क्लिक केल्यानंतर नागरिकांच्या मोबाईलमध्ये लोन अॅप डाउनलोड केले जाते. ही ॲप्स APK फाईल स्वरूपात किंवा काही वेळा प्ले स्टोअरवरही उपलब्ध असतात. ॲप डाउनलोड करताना संपर्क क्रमांक, फोटो, गॅलरी, एसएमएस यांसह विविध परवानग्या घेतल्या जातात.
यानंतर नागरिकांच्या मोबाईलमधील वैयक्तिक माहिती गुन्हेगारांच्या ताब्यात जाते. सुरुवातीला नागरिकांच्या बँक खात्यात तात्काळ कर्जाची रक्कम जमा केली जाते. मात्र त्यानंतर अल्पावधीतच मोठ्या व्याजासह परतफेडीची मागणी सुरू होते. पैसे न दिल्यास फोटो मॉर्फ करून नातेवाईकांना किंवा परिचितांना WhatsApp वर पाठवण्याची धमकी दिली जाते. काही प्रकरणांमध्ये बदनामीकारक संदेश प्रसारित करून मानसिक त्रासही दिला जात असल्याचे समोर आले आहे.
सायबर तज्ज्ञांनी नागरिकांना अनोळखी लिंकवर क्लिक न करण्याचे, कोणतेही लोन ॲप डाउनलोड करण्यापूर्वी त्याची सत्यता पडताळून पाहण्याचे आवाहन केले आहे. तसेच मोबाईलमधील वैयक्तिक माहितीची परवानगी देताना विशेष काळजी घेण्याचा सल्ला देण्यात आला आहे.
फसवणूक झाल्यास नागरिकांनी त्वरित सायबर हेल्पलाईन १९३० वर संपर्क साधावा किंवा राष्ट्रीय सायबर गुन्हे पोर्टलवर तक्रार नोंदवावी, असे आवाहन करण्यात आले आहे.
