महापालिका महासभेत उपसूचनेस मंजुरी; कुंदन गायकवाड यांचा पुढाकार
पिंपरी-चिंचवड : टाळगाव चिखली येथील टाऊन हॉलला “जगद्गुरू संत तुकाराम महाराज टाऊन हॉल” असे नामकरण करण्याच्या उपसूचनेस पिंपरी-चिंचवड महानगरपालिकेच्या महासभेत मंजुरी देण्यात आली. या निर्णयामुळे वारकरी संप्रदायाच्या सांस्कृतिक वारशाला सन्मान मिळाल्याची भावना नागरिकांकडून व्यक्त होत आहे. महापौर रवि लांडगे यांनी या उपसूचनेला मंजुरी दिली.
भाजपा नेते तथा आमदार महेश लांडगे यांच्या मार्गदर्शनाखाली महापालिका प्रशासनाच्या माध्यमातून टाळगाव चिखली येथे टाऊन हॉल उभारण्यात आला आहे. संत परंपरेशी निगडित असलेल्या या गावाला जगद्गुरू संत तुकाराम महाराजांचा आध्यात्मिक आणि सांस्कृतिक वारसा लाभलेला आहे. संत तुकाराम महाराजांच्या अभंगवाणीतील समता, मानवता आणि भक्तीभावाचा प्रभाव आजही परिसरातील सामाजिक व धार्मिक वातावरणात जाणवतो.
स्थानिक परंपरेनुसार, संत तुकाराम महाराजांनी या गावात टाळ ठेवले होते. त्यामुळेच या गावाला “टाळगाव चिखली” हे नाव पडल्याची श्रद्धा स्थानिकांमध्ये आहे. या ऐतिहासिक आणि सांस्कृतिक पार्श्वभूमीवर टाऊन हॉलला संत तुकाराम महाराज यांचे नाव देण्याची मागणी करण्यात आली होती.
महासभेत मंजूर झालेल्या उपसूचनेनुसार, टाळगाव चिखली येथील टाऊन हॉल आता “जगद्गुरू संत तुकाराम महाराज टाऊन हॉल” या नावाने ओळखला जाणार आहे. स्थानिक वारसा जतन करण्याच्या दृष्टीने हा निर्णय महत्त्वपूर्ण मानला जात आहे. ही उपसूचना भाजपा नगरसेवक कुंदन गायकवाड यांनी मांडली होती, तर नगरसेवक निखिल बोऱ्हाडे यांनी अनुमोदन दिले.
“टाळगाव चिखली ही संत परंपरेची भूमी आहे. जगद्गुरू संत तुकाराम महाराजांचा वारसा आणि त्यांच्या विचारांची प्रेरणा पुढील पिढ्यांपर्यंत पोहोचावी, या भावनेतून टाऊन हॉलला त्यांचे नाव देण्याची उपसूचना मांडली होती. महासभेने या प्रस्तावास मंजुरी दिल्याने गावाच्या सांस्कृतिक ओळखीला नवा सन्मान मिळाला आहे. आमदार महेश लांडगे यांच्या पुढाकाराने हा टाऊन हॉल उभारण्यात आला. आता तुकोबांच्या नावाने हे संकुल ओळखले जाईल, याचा मनोमन आनंद आहे.”
— कुंदन गायकवाड, नगरसेवक, भाजपा.
