सांगवीत संविधान सन्मानासाठी एल्गार; कायदेशीर लढ्याची पुढील दिशा ठरणार
पिंपरी-चिंचवड (प्रतिनिधी), : सांगवी येथील संविधान चौकातील संविधान शिल्प हटविल्याच्या निषेधार्थ काँग्रेस आणि समविचारी संघटनांच्या वतीने सुरू असलेल्या आंदोलनाचा आज दहावा दिवस आहे. संविधानाचा सन्मान, न्याय आणि नागरिकांच्या हक्कांसाठी सुरू असलेला हा लढा अधिक तीव्र करण्याचा निर्धार आंदोलकांनी व्यक्त केला आहे. आंदोलनाची पुढील दिशा ठरविण्यासाठी रविवार, १ नोव्हेंबर रोजी सर्वपक्षीय ‘संविधान सन्मान निर्धार सभे’चे आयोजन करण्यात आले आहे, अशी माहिती काँग्रेसचे पिंपरी-चिंचवड शहराध्यक्ष नरेंद्र बनसोडे यांनी दिली.
सांगवी येथील संविधान चौकात रविवारी सायंकाळी ५ वाजता ही सभा होणार आहे. आंदोलनाचा आढावा घेऊन पुढील दिशा निश्चित करण्याबरोबरच संविधान शिल्प हटविल्याप्रकरणी सुरू असलेल्या कायदेशीर लढ्याबाबत सर्वांना सोबत घेऊन सर्वानुमते निर्णय घेण्यात येणार आहे.
“संविधान चौकातील आंदोलनाच्या माध्यमातून आम्ही न्याय मिळविण्यासाठी सातत्याने पाठपुरावा करीत आहोत. आंदोलनाचा दहावा दिवस असून, उद्या सर्वपक्षीय निर्धार सभेच्या माध्यमातून एक महत्त्वाचे पाऊल उचलले जाणार आहे. संविधानाचा सन्मान आणि नागरिकांच्या न्याय्य हक्कांसाठी हा लढा अधिक जोमाने पुढे नेण्यात येईल.”
…..नरेंद्र बनसोडे, शहराध्यक्ष, कॉग्रेस पक्ष, पिंपरी चिंचवड
दरम्यान, आंदोलनस्थळी माजी पंतप्रधान स्व. इंदिरा गांधी आणि स्व. सरदार वल्लभभाई पटेल यांच्या जयंतीनिमित्त अभिवादन करून विनम्र आदरांजली वाहण्यात आली.
संविधान शिल्प हटविल्याच्या प्रकरणी न्याय मिळविण्यासाठी सुरू असलेल्या आंदोलनाची पुढील दिशा सर्वांच्या सहमतीने ठरविण्यात येणार आहे. या सभेला आंबेडकरी चळवळीतील नेते, सर्वपक्षीय नेते, पुरोगामी व सामाजिक संघटनांचे पदाधिकारी, संविधानप्रेमी नागरिक तसेच बंधू-भगिनींनी मोठ्या संख्येने उपस्थित राहावे, असे आवाहन नरेंद्र बनसोडे यांनी केले आहे.
