काँग्रेसच्या बेमुदत ठिय्या आंदोलनाचा चौथा दिवस; नगरसेविकेवरही गुन्हा दाखल करण्याची मागणी
चिंचवड/सांगवी, दि. २५ ऑक्टोबर २०२६ : सांगवी येथील संविधान चौकातील भारतीय संविधानाच्या प्रास्ताविकेचे शिल्प हटविण्यात आल्याच्या आणि स्मारकाच्या चौथऱ्याची मोडतोड झाल्याच्या निषेधार्थ काँग्रेसच्या नेतृत्वाखाली सुरू असलेल्या बेमुदत ठिय्या आंदोलनाचा रविवारी चौथा दिवस होता. शिल्पाची पूर्ववत प्रतिष्ठापना करावी आणि या प्रकरणात संबंधित नगरसेविका तृप्ती संतोष कांबळे यांच्यासह दोषींवर कायदेशीर कारवाई करावी, अशी मागणी पिंपरी-चिंचवड शहर काँग्रेसचे अध्यक्ष नरेंद्र बनसोडे यांनी केली.
या प्रकरणात पोलिसांनी नगरसेविकेचे पती संतोष कांबळे यांच्यावर किरकोळ स्वरूपाचा गुन्हा दाखल केल्याचा आरोप करत, राज्यकर्त्यांच्या दबावाखाली आंदोलन दडपण्याचा प्रयत्न होत असल्याची टीका बनसोडे यांनी केली. प्रशासनाने या प्रकरणाची गांभीर्याने दखल घ्यावी, अन्यथा राजकीय, सामाजिक आणि सांस्कृतिक परिणामांना सामोरे जावे लागेल, असा इशाराही त्यांनी दिला.
या प्रकरणात पोलिसांनी नगरसेविकेचे पती संतोष कांबळे यांच्यावर किरकोळ स्वरूपाचा गुन्हा दाखल केल्याचा आरोप करत, राज्यकर्त्यांच्या दबावाखाली आंदोलन दडपण्याचा प्रयत्न होत असल्याची टीका बनसोडे यांनी केली. प्रशासनाने या प्रकरणाची गांभीर्याने दखल घ्यावी, अन्यथा राजकीय, सामाजिक आणि सांस्कृतिक परिणामांना सामोरे जावे लागेल, असा इशाराही त्यांनी दिला.
“संविधानाच्या प्रास्ताविकेचे शिल्प हटविणे आणि स्मारकाच्या चौथऱ्याची मोडतोड केल्याच्या घटनेमुळे संविधानप्रेमी नागरिकांच्या भावना दुखावल्या आहेत. त्यामुळे शिल्पाची सन्मानपूर्वक पुनर्स्थापना करणे आणि घटनेत सहभागी असलेल्या सर्व संबंधितांवर योग्य ती कायदेशीर कारवाई करणे आवश्यक आहे. पोलिसांनी दाखल केलेल्या गुन्ह्यातील कलमे घटनेच्या गांभीर्याच्या तुलनेत अपुरी असल्याचा आरोपही त्यांनी केला. उपलब्ध पुरावे आणि घटनेचे स्वरूप विचारात घेऊन लागू कायदेशीर तरतुदींनुसार कारवाई करावी”
……. नरेंद्र बनसोडे,अध्यक्ष शहर काँग्रेस,पिंपरी चिंचवड.
महानगरपालिकेने १५ ऑक्टोबर रोजी पोलीस आयुक्तांना पत्र देऊन या प्रकरणाची माहिती दिल्याचेही बनसोडे यांनी सांगितले. या प्रकरणातील वस्तुस्थिती स्पष्ट करून प्रशासन आणि पोलिसांनी पुढील कार्यवाही करावी, असे ते म्हणाले.
शिल्प हटविण्यामागील उद्देशाची चौकशी करा
सांगवी परिसरातील इतर चौकांमध्ये महापुरुषांच्या आणि देवतांच्या मूर्ती असताना संविधानाच्या प्रास्ताविकेचे शिल्पच का हटविण्यात आले, असा सवाल उपस्थित करत या घटनेमागील नेमका उद्देश तपासण्याची मागणी ज्येष्ठ सामाजिक कार्यकर्ते मानव कांबळे यांनी केली.
संविधान हा कोणत्याही एका पक्षाचा किंवा समाजाचा विषय नसून तो सर्व नागरिकांच्या मूलभूत अधिकारांचा आधार आहे. संविधानाच्या सन्मानासाठी सुरू असलेल्या आंदोलनाला केवळ पक्षीय राजकारणाच्या चौकटीत पाहणे चुकीचे आहे. संविधानाच्या प्रास्ताविकेच्या शिल्पाची पुनर्स्थापना करणे ही आंदोलनाची प्रमुख मागणी असल्याचे कांबळे यांनी स्पष्ट केले.
आंदोलनाची दिशा बदलण्यासाठी काही व्यक्तींना आंदोलनस्थळी पाठविणे, समाजमाध्यमांवर रील तयार करणे किंवा वादग्रस्त वक्तव्ये करणे असे प्रकार होत असल्याचा आरोपही त्यांनी केला. संबंधित नगरसेविका आणि त्यांच्या पतीने या घटनेबद्दल चूक झाल्याची कबुली देऊन शहरातील नागरिकांची माफी मागावी, अशी मागणी त्यांनी केली.
स्थानिक आमदार शंकर जगताप यांनी संबंधितांना समज दिल्याचे सांगितले असले, तरी केवळ समज देऊन प्रश्न सुटणार नाही. शिल्पाची पुनर्स्थापना आणि नियमानुसार कायदेशीर कारवाई होणे आवश्यक आहे, असे कांबळे म्हणाले.
विविध संघटनांचा आंदोलनाला पाठिंबा
या ठिय्या आंदोलनाला काँग्रेसचे शहराध्यक्ष नरेंद्र बनसोडे, सामाजिक व पुरोगामी चळवळीचे नेते मानव कांबळे, मारुती भापकर, भ्रष्टाचार निर्मूलन समितीचे प्रांताध्यक्ष शांताराम खुडे, छावा मराठा युवा महासंघाचे अध्यक्ष धनाजी येळकर पाटील, आम आदमी पक्षाचे शशी बावनकर, पथारी संघटनेच्या नेत्या गौरी शेलार यांच्यासह काँग्रेसचे पदाधिकारी हरीश डोळस, देवदत्त रानवडे, हिराचंद जाधव, सदाशिव तळेकर, नबीलाल मुल्ला, गौरी नरसिंगे, कृष्णा जाधव, विल्यम साळवी, रवींद्र भोसकर, आप्पा शिंदे आणि आलोक लाड आदी उपस्थित होते.
आंदोलनाच्या प्रमुख मागण्या :
💮संविधानाच्या प्रास्ताविकेचे शिल्प पूर्ववत बसवावे.
💮घटनेची निष्पक्ष चौकशी करून दोषींवर योग्य ती कायदेशीर कारवाई करावी.
💮संबंधित नगरसेविका, त्यांचे पती आणि इतर सहभागी व्यक्तींच्या भूमिकेची चौकशी करावी.
💮प्रशासनाने या प्रकरणात स्पष्ट भूमिका घेऊन नागरिकांच्या भावना आणि संविधानाच्या सन्मानाचा विचार करावा.
