पिंपरी चिंचवड : प्रभाग क्रमांक २७, तापकीर नगर, काळेवाडी येथे हॉटेल राजरत्न शेजारी बांधकाम व्यावसायिकाने मुजोरीचा कळस गाठला आहे. येथे ‘लोटस् इन’ नावाचे लॉजिंग बांधताना सर्वसामान्य जनतेसाठी असलेला सार्वजनिक फुटपाथच पूर्णपणे गायब केला आहे. ही फुटपाथ चोरी नसून पिंपरी चिंचवड महानगरपालिकेच्या मालमत्तेवर दिवसाढवळ्या टाकलेला दरोडाच आहे.
या मुख्य रस्त्यावर दररोज शेकडो शालेय विद्यार्थी, ज्येष्ठ नागरिक, महिला, कामगार ये-जा करतात. फुटपाथ अस्तित्वात नसल्याने त्यांना भर रस्त्यातून जीव मुठीत घेऊन चालावे लागत आहे. कधीही मोठा अपघात होण्याची शक्यता असूनही ड प्रभागाचे अधिकारी जाणीवपूर्वक दुर्लक्ष करत आहेत का? असा संतप्त सवाल नागरिक विचारत आहेत.
या गंभीर प्रकरणी तात्काळ कारवाई करावी, संबंधित बांधकाम व्यावसायिकावर सार्वजनिक मालमत्तेची चोरी व अतिक्रमण केल्याप्रकरणी गुन्हा दाखल करून फुटपाथ तात्काळ मोकळा करावा, अशी लेखी तक्रार ड प्रभाग अधिकारी यांच्याकडे करण्यात आली आहे.
“जर प्रशासनाने ८ दिवसाच्या आत कारवाई केली नाही, तर शिवशाही शासन पक्ष व अखिल भारतीय हिंदू मातंग संघाच्या वतीने ड प्रभाग कार्यालयासमोर तीव्र आंदोलन छेडण्यात येईल, असा इशारा देण्यात आला आहे”
…….युवराज भगवान दाखले,संस्थापक प्रमुख – शिवशाही शासन पक्ष व अखिल भारतीय हिंदू मातंग संघ
