मागण्या मान्य होईपर्यंत आंदोलन सुरू ठेवणार – शहराध्यक्ष नरेंद्र बनसोडे
चिंचवड/सांगवी(प्रतिनिधी)दि. २२ ऑक्टोबर २०२६ : सांगवी येथील संविधान चौकातील संविधानाच्या प्रास्ताविका स्मारकाला कथितरीत्या बेकायदेशीरपणे हटवून त्या ठिकाणी तोडफोड केल्याच्या घटनेच्या निषेधार्थ, तसेच स्मारकाची पूर्ववत पुनर्स्थापना आणि संबंधितांवर कायदेशीर कारवाई करण्याच्या मागणीसाठी आज गुरुवार, दिनांक २२ ऑक्टोबर २०२६ रोजी सकाळी ११ वाजल्यापासून संविधान चौक, सांगवी येथे बेमुदत ठिय्या आंदोलनाला सुरुवात करण्यात आली. आंदोलनाचा आज पहिला दिवस असून, मागण्या मान्य होईपर्यंत आंदोलन सुरू ठेवणार असल्याची माहिती काँग्रेसचे शहराध्यक्ष नरेंद्र बनसोडे यांनी दिली आहे.
या आंदोलनात पिंपरी चिंचवड शहर जिल्हा काँग्रेसचे कार्यकर्ते, पुरोगामी व सामाजिक संघटनांचे प्रतिनिधी आणि संविधानप्रेमी नागरिक सहभागी झाले आहेत. संविधानाच्या प्रास्ताविकेचे महत्त्व अधोरेखित करत, संविधानाने दिलेल्या समता, स्वातंत्र्य, बंधुता आणि न्याय या मूल्यांचे रक्षण करण्यासाठी हे आंदोलन सुरू करण्यात आले आहे असे काँग्रेस शहराध्यक्ष नरेंद्र बनसोडे यांनी सांगितले आहे.
यावेळी बनसोडे म्हणाले की,सांगवी येथील संविधान चौकातील प्रास्ताविका स्मारक हटविण्याची आणि तोडफोडीची घटना अत्यंत गंभीर असून, या प्रकरणाची निष्पक्ष चौकशी करून जबाबदार व्यक्तींवर कायद्यानुसार कारवाई करण्यात यावी.पिंपरी चिंचवड महानगरपालिकेच्या ‘ह’ प्रभाग अधिकाऱ्यांनी १५ ऑक्टोबर २०२६ रोजी या कृतीबाबत पोलीस आयुक्तांना लेखी कळविले आहे. संविधानाचा सन्मान आणि नागरिकांच्या घटनात्मक मूल्यांचे रक्षण ही सर्वांची सामूहिक जबाबदारी आहे. त्यामुळे प्रशासनाने या प्रकरणाची गांभीर्याने दखल घेऊन मागण्यांवर तातडीने कार्यवाही करावी असे मत बनसोडे यांनी व्यक्त केले.
संविधानाच्या प्रास्ताविका स्मारकाची पुनर्स्थापना आणि संबंधित प्रकरणात कायद्यानुसार ठोस कारवाई होईपर्यंत बेमुदत ठिय्या आंदोलन सुरू ठेवण्याचा निर्धार यावेळी व्यक्त करण्यात आला. संविधानप्रेमी नागरिक, पुरोगामी चळवळीतील कार्यकर्ते, सामाजिक संघटना आणि लोकशाही मूल्यांवर विश्वास ठेवणाऱ्या सर्वांनी या आंदोलनाला पाठिंबा द्यावा, असे आवाहन आंदोलकांच्या वतीने करण्यात आले.
काँग्रेसचे शहराध्यक्ष नरेंद्र बनसोडे, अखिल भारतीय काँग्रेस कमिटीचे सचिव पृथ्वीराज साठे, पुरोगामी चळवळीचे नेते विचारवंत मानव कांबळे, सामाजिक चळवळीचे नेते मारुती भापकर, ओबीसी संघर्ष समितीचे आनंदा कुदळे, छावा मराठा युवा महासंघाचे अध्यक्ष धनाजी येळकर पाटील, सर्वहारा उत्कर्ष समितीचे, बी.बी. शिंदे, अल्पसंख्यांक विभागाचे अध्यक्ष शाहबुद्दीन शेख, शहर काँग्रेसचे उपाध्यक्ष, रवींद्र भोसकर, हरीश शिंदे, वीरेंद्र गायकवाड संदीप शिंदे सुरज माने, सदाशिव तळेकर, डेनिस देवनसन,नवीलाल मुल्ला,कबीर मोहम्मद, हिराचंद जाधव, हरीश डोळस बाबा गायसमुद्रे, मिलिंद बनसोडे, देवदत्त रानवडे, अनिता साळवे, अनिता सोनवणे, रितिका शर्मा,महावेद वाळुंजकर आदी उपस्थित होते.
