पिंपरी-चिंचवडमध्ये १२ कलाकारांच्या सादरीकरणाने प्रेक्षक मंत्रमुग्ध; संपूर्ण महाराष्ट्रात प्रयोग सादर करण्यासाठी प्रयत्न करणार – आमदार प्रसाद लाड
पिंपरी-चिंचवड : पंतप्रधान नरेंद्र मोदी यांच्या गुजरातचे मुख्यमंत्री ते भारताचे पंतप्रधान या २५ वर्षांच्या राजकीय प्रवासाचा वेध घेणारा ‘नमो सेवा गाथा’ हा विशेष कार्यक्रम पिंपरी-चिंचवडमधील प्राधिकरण येथील ग. दि. माडगूळकर सभागृहात उत्साहात पार पडला. चलचित्रे आणि १२ कलाकारांच्या प्रभावी अभिनयातून साकारलेल्या या ३० मिनिटांच्या कलाकृतीने उपस्थित प्रेक्षकांना मंत्रमुग्ध केले.
या कार्यक्रमाला पदवीधर व शिक्षक मतदारसंघाचे निवडणूक प्रभारी विधान परिषद आमदार प्रसाद लाड, कार्यक्रमाचे महाराष्ट्र प्रदेश सहसंयोजक आमदार अमित गोरखे, भाजपचे जिल्हाध्यक्ष शत्रुघ्न (बापू) काटे, चिंचवडचे आमदार शंकर जगताप, विधान परिषद आमदार उमाताई खापरे, माजी आमदार अश्विनीताई जगताप, माजी जिल्हाध्यक्ष सदाशिव खाडे, जिल्हा सरचिटणीस मोरेश्वर शेडगे व मधुकर बच्चे, वैशाली खाडे, युवा मोर्चाचे जिल्हाध्यक्ष दिनेश यादव, माजी उपमहापौर शैलजाताई मोरे, नगरसेविका अनुराधाताई गोरखे, माधुरी शिंदे यांच्यासह अनेक मान्यवर आणि नागरिक उपस्थित होते. कार्यक्रमाच्या दिग्दर्शिका गौरी लोंढे आणि सर्व सहभागी कलाकारही या वेळी उपस्थित होते.
कार्यक्रमानंतर मनोगत व्यक्त करताना आमदार प्रसाद लाड यांनी या कलाकृतीचे विशेष कौतुक केले. अत्यंत कमी वेळेत नरेंद्र मोदी यांच्या २५ वर्षांच्या कार्यकाळाचा प्रवास प्रभावीपणे सादर केल्याबद्दल त्यांनी कलाकारांचे अभिनंदन केले. ही कलाकृती संपूर्ण महाराष्ट्रात सादर व्हावी, यासाठी आपण स्वतः महाराष्ट्र प्रदेश आणि केंद्र स्तरावर प्रयत्न करणार असल्याचे त्यांनी जाहीर केले.
२०१४ मध्ये नरेंद्र मोदी पंतप्रधान झाले, त्या वर्षी जन्मलेल्या मुलांनाही त्यांच्या कार्यकाळाचा आणि प्रवासाचा परिचय या कलाकृतीच्या माध्यमातून सहजपणे करून देता येईल, असे मत लाड यांनी व्यक्त केले. इतिहास आणि राजकीय प्रवास कलात्मक पद्धतीने नव्या पिढीपर्यंत पोहोचविण्याच्या दृष्टीने हा उपक्रम महत्त्वपूर्ण असल्याचेही त्यांनी नमूद केले.
या वेळी आमदार अमित गोरखे, आमदार शंकर जगताप, भाजप जिल्हाध्यक्ष शत्रुघ्न काटे, जिल्हा संयोजक राजाभाऊ दुर्गे, दिग्दर्शिका गौरी लोंढे आणि सर्व कलाकारांचे त्यांनी अभिनंदन करून आभार मानले.कार्यक्रमाचे सूत्रसंचालन ‘नमो सेवा गाथा’ अभियानाचे पिंपरी-चिंचवड शहर जिल्हा संयोजक राजाभाऊ दुर्गे यांनी केले, तर प्रास्ताविक आमदार अमित गोरखे यांनी केले.
